Archival gipasakaan og kaso ngadto sa Ombudsman

CEBU, Philippines — Si Cebu City Mayor Nestor Archival, Sr. gipasakaan og kasong kriminal ug administratiba ni Ed Karlon Rama ngadto sa Office of the Ombudsman niadtong Agosto 19, 2026 kini kalambigitan sa pagdumala sa mayor sa kontrobersiyal nga Monterrazas de Cebu nga usa ka real estate development ubos sa Mont Property Group Inc.

Si Rama, residente kini sa Barangay Guadalupe diin nahimutang ang Monterrazas.

Nalatid sa affidavit nga giingong adunay rehistradong 713 square meter nga luna nga gipanag-iya si Archival diha sulod sa Monterrazas Subdivision ubos sa transfer certificate of title nga nakuha niadtong Oktubre 2022.

Giingong wala motubag si Archival sa mga panawagan gikan sa mga residente lakip kang Bise Mayor Tomas Osmeña ug sa pipila ka miyembro sa konseho nga moluwat og cease-and-desist order (CDO) batok sa proyekto human sa grabeng pagbaha sa ubos nga mga lugar sukad pa sa bagyong Tino niadtong Nobiyembre 3, 2025.

Gikataho nga ang Department of Environment and Natural Resources (DENR) nisang-at kini og kaso batok sa The Mont Property Group, Inc. niadtong Disyembre 3, 2025 tungod sa giingong paglapas sa Revised Forestry Code.

Gikutlo usab ang mga regulatory findings nga nakalapas kini sa Presidential Decree No. 1586 kun “Philippine Environmental Impact Statement System, Philippine Clean Water Act of 2004” tungod kay wala kini discharge permit.

Ang proyekto giingong nakahimo kini og 10 ka kalapas subay sa 33 ka kondisyon sa Environmental Compliance Certificate (ECC) diin 11 na lang ka kahoy ang nahibilin gikan sa 700 nga nagbarog niadtong 2022 bisan pa og adunay permit sa pagpamutol og kahoy ang developer.

Bisan og nalibkas sa DENR ang CDO niadtong Abril 2026 apan padayon nga niduso og resolusyon ang bise mayor sa konseho nga mo isyu og CDO batok sa Monterrazas aron ipahunong ang tanang kalihokan sa development gawas sa pagtukod og water catchment facilities.

Gitumbok sa reklamo nga si Archival giingong nipadayon sa iyang posisyon niadtong Hunyo 2026 nga walay legal nga basehan ang siyudad sa pagpagawas og CDO ug ang pagpatuman sa environmental regulations ubos kini sa DENR.

Ug giingong wala gipahibalo ni Archival ang iyang pagpanag-iya og luna sa subdivision ug wala usab kini niluwat og mga executive nga hukom kalabot sa proyekto.

Si Rama nagkanayon nga si Archival nakalapas sa Akta Republika 3019 kun Anti-Graft and Corrupt Practices Act” nga hinungdan sa iyang pagpasaka og kaso batok sa mayor.

Lakip sa kasong gipasaka batok kang Archival mao ang administratibong mga kaso nga Grave Misconduct, Grave Abuse of Authority, ug Conduct Prejudicial to the Best Interest of the Service.  (BANAT NEWS)