Obet posibleng pumasok sa PAR sa Linggo - PAGASA
MANILA, Philippines — Isa pang bagyo na may international name na Saudel ang binabantayan ng PAGASA na posibleng pumasok sa Philippine Area of Responsibility (PAR) sa pagitan ng Linggo at Lunes.
Namataan ang bagyo sa layong 2,800 kilometro silangan ng Eastern Visayas. Taglay nito ang lakas ng hangin na 75 kph at may pagbugso hanggang 90 kph.
“’Yung binabantayan nating tropical storm na may international name na Saudel ay inaasahang posibleng pumasok ng PAR sa pagitan ng darating na Linggo hanggang Lunes,” ayon kay Chris Perez, Assistant Weather Services Chief ng PAGASA
Kapag pumasok sa PAR, tatawagin itong Bagyong Obet.
Hindi inaalis ng PAGASA ang posibilidad na palakasin pa ng Obet ang Habagat sa susunod na linggo.
“Posible itong kumilos patungong Taiwan area. Kung titignan ang pattern ng mga nagdaang bagyo, favorable pa rin ito sa pagpapaibayo ng Habagat,” dagdag ni Perez.
“Hindi natin isinasantabi na posibleng next week, may panibago tayong Habagat episode.”
- Latest
