Ex-1 PACMAN solon nagretiro bilang AFP reservist
Serbisyo sa bayan, tuloy
MANILA, Philippines — Pormal nang nagretiro sa Armed Forces of the Philippines (AFP) Reserve Force si dating 1-PACMAN Party-list Rep. at AFP reservist Brig. Gen. Michael “Mikee” Romero matapos tapusin ang kanyang tungkulin bilang Wing Commander ng Tactical Operations Wing Reserve Northern Luzon, epektibo Agosto 19, 2026.
Sa kanyang retirement letter kay AFP Chief of Staff Gen. Antonio Nafarrete, nagpasalamat si Romero sa pamunuan ng AFP at mga sundalong nakasama niya sa serbisyo. Bilang mambabatas, naging bahagi rin siya ng pagsusulong ng dagdag-sahod at benepisyo para sa uniformed personnel at ng ?22-bilyong pondo para sa pagbili ng tatlong C-130J Super Hercules aircraft ng Philippine Air Force.
Bilang reservist, lumahok si Romero sa mahigit 60 humanitarian missions, kabilang ang food assistance, medical at dental missions, educational support at disaster response na nakatulong sa mahigit 20,000 Pilipino. Naging bahagi rin siya ng pagpapalakas ng Association of Reservists and Reservist Administrators of the Philippines (ARRAPI), na umabot sa mahigit 5,000 miyembro sa ilalim ng kanyang pamumuno.
Bagama’t natapos na ang kanyang serbisyo sa uniporme, sinabi ni Romero na magpapatuloy ang kanyang paglilingkod sa bayan sa larangan ng public service, national defense at humanitarian work. “Tapos man ang serbisyo sa uniporme, tuloy ang tungkulin sa bayan, soberanya at bandila,” pahayag niya.
- Latest
