Gov. Baricuatro nimandong pahugtan ang seguridad

CEBU, Philippines — Human sa lain na pung dugoong pagpamusil didto sa Zamboanga kagahapon, gimando ni Cebu Governor Pamela Baricuatro sa kapulisan sa probinsya nga pahugtan ang seguridad sa mga public ug private schools sa tibuok Cebu.

Gimandoan ni Baricuatro si PNP Provincial Director Police Colonel Abubakar Udang Mangelen Jr. ug ang tanang Chiefs of Police (COPs) sa mga siyudad ug lungsod sa Cebu nga dugangan ang presensiya sa mga polis sa mga eskwelahan.

Kabahin ni sa “one-police-to-school deployment scheme,” nga ipatuman hangtod sa city ug municipal levels.

Sumala sa gobernador, ang maong lakang gitumong aron mapugngan ang posibleng hulga ug masiguro ang mas paspas nga pagresponde kung adunay insidente sulod o palibot sa mga eskwelahan.

Gimandoan usab ang kapulisan nga maghimo og regular security inspections sa mga campus ug palig-onon ang koordinasyon tali sa law enforcement agencies ug school authorities.

“The safety and security of our students, teachers, and school personnel remain among our foremost priorities,” matud ni Baricuatro.

Matud pa niya, kinahanglan nga ang mga eskwelahan magpabiling luwas nga lugar diin ang mga bata makakat-on, motubo ug makapangandoy alang sa ilang kaugmaon.

 “Our schools should be safe spaces for learning, growth, and hope, and the Provincial Government of Cebu will continue to work with the police, schools, and communities to safeguard our students and ensure their safety,” dugang pa ni Baricuatro.

Way Nisanong

Sa pikas bahin, ang National Bureau of Investigation (NBI)-7 nag-awhag sa mga eskwelahan nga moapil sa libre nga mga lektyur ug information drives sa ilang ahensya aron mapalambo ang kahibalo ug mapalig-on ang seguridad sa mga eskwelahan.

Bisan pa sa libre nga mga lektyur sa NBI, wala pa’y pampublikong eskwelahan nga gikatahong midawat sa tanyag sa NBI-7 karon, mga pribadong eskwelahan pa lamang ang mitubag sa maong inisyatiba.

Matud ni NBI-7 spokesperson Agent Maria Contessa Lastimoso, nagpadala sila og mga sulat ngadto sa pipila ka pampublikong eskwelahan sa Cebu City, lakip ang Abellana, Lahug, Zapatera ug Guadalupe, aron dapiton sa pag-apil sa school information drive.

 Apan, wala pa sila makadawat og tubag gikan sa mga eskwelahan.

Padayon ang paningkamot sa NBI nga maapil ang mga eskwelahan sa mga kalihokan may kalabotan sa safety ug awareness para malikay tanan sa sitwasyong moabot sama sa nahitabo sa mga nanglabay nga mga school shootings. – Mitchelle L. Palaubsanon, IBM BANAT NEWS