SR&T nanoktok sa korona sa CABC
CEBU, Philippines — Ang SR&T Industrial Supply mipayaka sa Boysen Paints, 88-73, aron pagposte og 1-0 nga bentaha sa best-of-three finals sa Cebu Architects Basketball Club (CABC) 8th Corporate Cup didto sa Game Changer Sports Facility sa dalan Hernan Cortes Street sa Barangay Banilad, dakbayan sa Mandaue.
Si Dexsel Caadan mirehistro og double-double nga 20 puntos ug 13 ka rebounds uban ang tulo ka assists ug tulo ka blocks alang sa SR&T , nga nanginahanglan og usa na lang ka daog aron masakmit ang gihandum nilang korona.
Sila si Chester Hinagdanan ug Criz Matunog nagkumbinar og 23 puntos ug walo ka rebounds alang sa SR&T, nga alkansi og tres puntos, 41-44, sa halftime.
Apan ang SR&T milusad og eksplosibong opensiba sa second half diin sila miabante og 16 puntos, 85-69, sa naghinapos nga bahin sa duwa.
Si Lemuel Aspacio maoy nangu sa Boysen uban ang 19 puntos samtang sila si Justin Aspacio ug Kim Rebosura mitali og 12 puntos matag usa sa pildirong kawsa.
Ang Game 2 gitakda karong Domingo, Agosto 23.
Sa tinagakay nga sangka alang sa ikatulong dapit, sila si Rei Aureo ug James Nacario parehong mikadlit og double-double sa dihang gilampaso sa Corr Chem ang Landlite, 102-72.
Si Aureo mikolekta og 26 puntos ug 14 ka rebounds nga iyang gisukipan og duha ka assists ug usa ka steal samtang si Nacario mipupo og 22 puntos ug 13 ka rebounds uban ang tulo ka assists ug duha ka steals.
- Latest
