Kai Sotto mobalik og duwa sa Gilas

CEBU, Philippines — Ang higanteng sentro nga si Kai Sotto moduwa og balik sa Gilas Pilipinas. Mismo ang 7-foot-3 nga big man mao ang mipahibawo niini sa iyang Instagram.

Gani si Sotto miapil na sa praktis sa Gilas niadtong Lunes.

Ang 24-anyos nga si Sotto katapusang mipakita'g aksiyon uban sa Gilas niadtong 2025 FIBA Asia Cup qualifiers.

Tataw nga ang iyang presensiya makapalig-on sa puwersa sa Gilas, nga nagkupot og 2-4 rekord.

Ang Gilas makigsangka batok sa Jordan ug Iran sa 4th window sa FIBA Basketball World Cup 2027 Asian Qualifiers.

Ipahigayon ang duha ka duwa dinhi sa nasud. Ang Gilas makig-atbang sa Jordan sa Agosto 28 ug dayong makigbugno sa Iran sa Agosto 30 sa SM Mall of Asia Arena sa siyudad sa Pasay.

Sa kasamtangan, ang Pilipinas naglingkod sa ikalimang dapit sa Group E sunod sa Australia (6-0), Iran ug Jordan (5-1), ug New Zealand 4-2.

Ang Top 3 lamang sa Group E ug F ingon man ang ikaupat nga labing maayong team ang mo-qualify alang sa 2027 World Cup didto sa Qatar.