Archival nangayo og tabang ni senador Ejercito alang sa CCMC

CEBU, Philippines — Nangayo og P400 milyones nga tabang ang Kagamhanan sa Dakbayan sa Sugbo ngadto kang Senador JV Ejercito alang sa Cebu City Medical Center.

Kini ang gipahibalo ni Kenneth Siasar kinsa chief of staff ni Mayor Nestor Archival nga miingon nga nakita gyud sa senador ang tinud-anay nga sitwasyon sa CCMC atol sa pagbisita niini niadtong Sabado, Agosto 15, 2026.

Nakita sa senador kung unsa ka tabangunon ang CCMC nga gihulagway nga hapit na mag-12 ka tuig nga gitukod.

Nakit-an mismo sa senador ang kahuot sa emergency room diin imbes 40 hangtod 45 ra ka pasyente ang masulod sa mga higdaanan, moabot kini sa 60 hangtod 65 ka pasyente matag adlaw.

Ang uban nga mga pasyente naglingkod na lang samtang nag-dextrose ug nag-oxygen. Molabaw na sab sa 200 ka out-patients ug 200 ka admitted patients ang giserbisyohan sa CCMC matag adlaw.

Mao nga nangayo og tabang ang siyudad sa senador alang sa pagpalit og pagbutang ug mga ekipo sa Operating Room (OR), Delivery Room (DR), Intensive Care Unit (ICU), ug Emergency Room samtang nagpadayon pa ang konstruksyon sa pipila ka andana sa tambalanan aron dili na kinahanglan nga bakbakon pag-usab ang mga bungbong.

Ang maong pondo igahin sab sa rehabilitasyon sa kasamtangang una hangtod ikatulong andana nga gigamitan lang karon og temporary nga bongbong nga ginama sa plywood.

Bisan og wala’y klaro nga tubag ang senador sa hangyo sa siyudad, apan nipasalig kini nga motabang aron mahuman na ang ospital.

Gipadayag ni Siasar nga base sa body language sa senador ug pagtan aw sa kahimtang sa mga pasyente, maninguha kini nga makahatag ug tabang pinansyal sa CCMC.  (BANAT NEWS)