Kalabera, mga bukog sa SRP

CEBU, Philippines — Usa ka kalabera sa tawo ang nakuykoyan atol sa pagpanglimpyo sa usa ka backhoe sa gitambak nga yuta diha sa Bypass Road duol sa Balay Silangan, SRP, Cebu City  kagahapon sa hapon, adlaw nga Lunes.

Sa pakighinabi sa Banat News kang Ervin Leal, backhoe operator, nga samtang iyang gihawanan sa mga sagbot gamit ang excavator, iyang namatikdan ang daw lingin nga butang nga naligid gikan sa iyang scoop. Sa una niyang tan-aw, gatuo siyang basin duwaan ra ni apan sa iyang gisusiog maayo ug didto niya nakita nga ulo diay to nga kalabera sa tawo.

Tungod niini, iyang gitawagan dayon ang iyang mga kauban ug gipahibalo ang insidente sa kapulisan.

Dali usab nga mitubag ang mga personnel sa Mambaling Police Station aron susihon ang lugar ug ang nakit-ang mga bukog.

Sa pagkakaron, wala pa matino sa mga awtoridad kung lalaki ba o babaye ang tag-iya sa mga bukog.

Gipadayon pa ang imbestigasyon aron mahibal-an ang pagkatawo sa namatay ug kung kanus-a ug giunsa pagkamatay niini.

Gawas sa mga bukog ug kalabera, naay nakitang coin purse nga naay mga sensilyo, sapatos nga panglalaki ug relo diha duol sa kalabira ug mga bukog.  Wala pa matino kun iyaha ba kadto sa maong kalabera. (BANAT NEWS)