Motor nagsungag sa bus, rider patay
CEBU, Philippines — Patay ang 44-anyos nga motorcycle rider human mabangga ang iyang gimanehong motor sa usa ka bus sa Provincial Road, Barangay Lanas, Naga City, Cebu, niadtong Sabado sa gabii, Agosto 15.
Ang biktima giila lamang sa alyas nga “Ruel,” residente sa Barangay Lanas, samtang ang bus gimaneho ni alyas “Ed,” 50, residente sa Barangay Uling, Naga City.
Base sa inisyal nga imbestigasyon sa City of Naga Police Station, nagkasugat og direksyon ang duha ka sakyanan sa wala pa nahitabo ang insidente.
Padulong sa Toledo City si Ruel samtang paingon sa Naga Proper ang bus nga gimaneho ni Ed.
Pag-abot sa nahitaboan nagkasungag ang duha ka sakyanan. Nakaangkon og grabeng kadaut sa kalawasan ang rider.
Gidala dayon si Ruel sa Naga Health Infirmary, apan gideklarar siyang dead on arrival sa attending physician.
Samtang, gidala sa kapolisan sa ilang kustodiya ang driver sa bus human sa insidente. (BANAT NEWS)
- Latest
