Gidudahang kabit, gidunggab sa bana

CEBU, Philippines — Nalandig sa tambalanan ang usa ka 24-anyos nga construction worker human giingong gidunggab sa makadaghang higayon sa iyang project contractor tungod sa giingong relasyon niini sa asawa sa suspek sa Upper La Guerta, Barangay Lahug, Cebu City, alas 1:50 sa kaadlawon niadtong Lunes, Agosto 17.

Giila ang biktima nga si Alvin, samtang ang suspek giila lamang sa alyas nga “Jestoni,” 36 anyos.

Base sa report sa Mabolo Police Station, nasuko ang suspek human nahibaw-an ang giingong relasyon ni Alvin sa iyang 28-anyos nga asawa.

Nagsugod ang pagduda sa suspek samtang naa siya sa Negros Oriental niadtong Agosto 6 aron mobisita sa iyang pamilya.

Pagbalik niya sa Cebu, iyang gisusi ang cellphone sa iyang asawa ug nakit-an ang ilang mga mensahe ni Alvin.

Giatubang sa suspek ang iyang asawa bahin niini. Giingong miangkon ang iyang asawa nga nakig-inom siya kang Alvin ug nga gihagkan siya niini, apan gilimod niini nga aduna silay relasyon.

Silingan ang suspek ug si Alvin sa Upper La Guerta, ug kaniadto gihatagan pa sa suspek og trabaho si Alvin sa iyang mga construction project.

Alas 1:50 sa kaadlawon, gikan sa panagtapok sa balay sa ilang silingan si Alvin ug pauli na unta sa ilang balay apan sa iyang pag-agi, nilili kini sa sulod sa balay sa magtiayon human makadungog sa ilang panaglalis.

Nakit-an siya sa suspek ug giingong gigukod og kutsilyo hangtud nga naabtan ug gidunggab og makadaghang higayon.

Gidala dayon si Alvin sa ospital alang sa pagtambal sa iyang mga samad, samtang nagpabilin sa kustodiya sa Mabolo Police Station ang suspek. (BANAT NEWS)