Manag-inahan gipanimaslan, gipangtigbas

CEBU, Philippines — Naangol ang usa ka inahan ug iyang 13-anyos nga anak human sila kalit nga gisulod sa ilang balay gipangtigbas samtang sila nangatulog  niadtong Domingo sa gabii, Agosto 16.

Nahitabo ni sa Barangay Paril, Cebu City diin nasamdan sa iyang nawong ang 13-anyos ug nasamdan sa abaga ug bukton ang iyang inahan nga pareho karong nagpaalim sa tambalanan,

Nadakpan ra sad dayun ang suspek giila nga si Angelo Naquines, alyas “Loloy,” 22 anyos, residente sa Sitio Upper Cantisang, Barangay Paril ug anaa sa kustodiya sa Adlaon Police Station.

Sumala ni Police Capt. Leonyl Iren, hepe sa Adlaon Police Station, giingong hubog ang suspek ug nagsamok-samok sulod sa usa ka disco sa wala pa ang insidente. Nakakita kini og sumbagay sa sulod hinungdan nga gipagawas siya sa mga tawo didto.

Usa sa matud pa niabog sa suspek pagawas sa diskohan mao ang padre de pamilya sa mga biktima.

Human makagawas sa disco, giingong miadto ang suspek sa balay sa maong lalaki aron manimalos.

Apan ang manag-inahan  nga nangatulog maoy iyang naabtan ug maoy iyang gipangtigbas gamit ang bolo.

Matud sa suspek, adunay misumbag kaniya sa wala pa siya gipagawas sa disco, hinungdan nga ningitngit iyang panan-aw ug nakahukom siya nga manimalos.

Gituohan niya nga ang misumbag kaniya mao ang bana sa biktimang ginang.

Positibo nga giila sa mga biktima ang suspek isip maoy miatake kanila, hinungdan nga gilusad sa kapolisan ang hot-pursuit operation.

Nasikop ang suspek pasado alas 12:05 sa kaadlawon niadtong Agosto 17 sa laing sitio nga duol ra sa lugar sa insidente.

Matud ni Iren, duol ra sa lugar ang mga pulis tungod kay adunay disco niadtong gabhiona.

Nangayo usab og tabang ang mga residente ug barangay public safety officers o BPSO human sa pag-atake, nga nakatabang sa mga pulis sa pagpangita ug pagkadakop sa suspek.

Nag-andam na ang kapolisan sa pagsaka og kasong frustrated murder batok sa suspek. (BANAT NEWS)