Ex-OVP officer unang ‘hostile witness’

MANILA, Philippines — Humarap kahapon sa impeachment trial ni Vice President Sara Duterte si Gina Acosta, da­ting Special Disbursing Officer ng Office of the Vice President (OVP), na idineklara bilang ­unang hostile witness ng prosekusyon.

Ang hostile witness ay tumutukoy sa isang taong tinawag ng isang partido upang tumestigo kahit taliwas o hindi pabor sa interes ng naturang partido ang kanyang posisyon.

Sinabi ni private pro­secutor Amando Virgil Ligutan na si Acosta ang kauna-unahang “hostile witness” ng prosekusyon na kinatigan naman ni Presiding Officer Francis “Chiz” Escudero.

Iniharap ng prosekus­yon si Acosta upang patunayan na gumastos ang OVP ng P125 mil­yon mula sa confidential funds sa loob ng 11 araw, at P375 milyon sa loob ng tatlong quarter, nang walang maayos na liquidation at kulang sa dokumento. Si Acosta ang tumanggap at nag-encash ng P500 mil­yon confidential funds mula 2019 hanggang 2022, ngunit ibinigay umano sa security officer na si Col. Raymund Dante Lachica.

Sa counter-affidavit na iprinisinta ni Ligutan, nakasaad na hindi responsable si Duterte sa maling paggamit ng confidential funds.

Noong una, kumontra si Atty. Lindon Bacquel ng defense na tumestigo rin si Acosta tungkol sa confidential funds sa Davao City dahil hindi relevant at hindi bahagi ng impeachment trial ni Duterte.

Subalit iginit naman ni Ligutan na relevant ang testimonya ni Acosta dahil mula Davao City ay isinama siya ng Bise Presidente at ginawa ring SDO ng OVP. Kasalukuyang Vice Presidential Staff Officer VI si Acosta.