P8.2 milyong shabu, unom nadakpan

CEBU, Philippines — Unom ka mga tawo ang nasikop sa managlahing anti-illegal drug operations sa Bohol ug Cebu, diin kapin 1.2 ka kilo sa gituohang shabu nga adunay kinatibuk-ang gibanabanang kantidad nga kapin P8.2 milyon ang nasakmit sa mga otoridad.

Sa Tagbilaran City, 204.8 gramos nga gituohang shabu, nga adunay standard drug price nga P1,392,640, ang nasakmit atol sa buy-bust operation sa Barangay Mansasa niadtong Sabado sa gabii, Agosto 15.

Nasikop ang 47-anyos nga construction worker nga alyas “Ambo,” nga giila sa kapolisan isip high-value individual (HVI).

Sumala sa Tagbilaran City Police Station, gipahigayon sa Drug Enforcement Team ang operasyon sa Purok 7, Mahogany Street, Barangay Mansasa, alas-9:28 sa gabii.

Gisugdan ang operasyon human makadawat og impormasyon gikan sa usa ka confidential informant, nga gisundan og kapin duha ka semana nga case buildup aron mamonitor ug mapamatud-an ang kalihokan sa suspek.

Base sa intelligence information, gituohang nakadispose ang suspek og 50 hangtod 100 gramos nga shabu matag semana.

Atol sa operasyon, nasakmit ang 5.6 gramos nga suspected shabu nga giingong subject sa drug sale, samtang duha pa ka sachet nga adunay hiniusang gibug-aton nga 199.2 gramos ang giingong nakumpiska isip possession.

Apil usab sa mga nasakmit ang marked money, 29 ka bogus nga P500 bills nga gihimong buy-bust money, ug usa ka Android cellphone.

Narekord sa kapolisan nga ang suspek, nga nailhan usab kaniadto sa alyas “Johnel,” nadakpan na niadtong 2024 tungod sa paglapas sa Section 11 sa Republic Act 9165 ug nakabenepisyo kaniadto sa plea bargain.

Kasamtangang anaa siya sa kustodiya sa Tagbilaran City Police Station Custodial Facility samtang giandam ang tukmang kaso batok kaniya.

Sa laing operasyon sa Central Visayas, upat ka tawo ang nasikop, lakip ang giingong maintainer sa drug den, sa hiniusang operasyon sa Philippine Drug Enforcement Agency Regional Office 7 (PDEA 7) ug Mandaue City Police Office Station 3 sa Sitio Alliance, Barangay Basak, Mandaue City, alas-4:10 sa hapon niadtong Agosto 15.

Giila ni PDEA 7 Regional Director Joel B. Plaza ang giingong drug den maintainer nga si alyas “Tata,” 37, usa ka roof installer ug residente sa maong lugar..

Nasikop usab ang tulo ka giingong bisita sa maong lugar nga sila alyas “Roel,” 35; “Johnel,” 26; ug “Rosalyn,” 40.

Nakumpiska ang unom ka pakete sa suspected shabu nga mokabat sa walo ka gramos, nga adunay gibanabanang kantidad nga P54,400, dugang ang usa ka empty sachet nga adunay traces sa shabu, duha ka strips sa foil nga adunay traces sa shabu, buy-bust money ug drug paraphernalia.

Ang mga ebidensya gisumiter sa PDEA 7 Regional Office Laboratory alang sa examination ug proper disposition. Ang upat ka suspek temporaryong gipabilin sa PDEA 7 detention facility sa Lahug, Cebu City.

Samtang sa laing operasyon sa Barangay Kalunasan, Cebu City, usa ka suspek nga giila sa alyas “Mac-Mac,” 39 anyos, residente sa Pulpogan, Consolacion, ang nasikop kagahapon sa hapon.

Si “Mac-Mac” giingong nagtrabaho isip garbage truck driver nga taga Consolacion,

Mokabat sa usa ka kilo nga gituohang shabu, nga gibanabanang kantidad og P6.8 milyon, ang nasakmit sa operasyon niadtong Sabado sa hapon.

Base sa inisyal nga impormasyon, kapin sa pipila ka semana nga gisurveillance sa mga otoridad ang suspek sa wala pa gilusad ang operasyon.

Gituohang adunay papel ang suspek isip bodegero o tigtipig sa ilegal nga droga, ug posible nga moabot sa usa ka kilo matag bulan ang iyang gi-handle nga supply nga gipangapod-apod sa Cebu City ug mga kasikbit nga lugar.

Gisusi usab sa mga imbestigador ang impormasyon nga ang kontak sa suspek posibleng usa ka tawo nga gikan sa prisohan.

Padayon ang imbestigasyon aron masuta ang posibleng ubang miyembro sa network ug ang tinubdan sa nakumpiskang droga.

Ang tanang suspek anaa na sa kustodiya sa mga otoridad ug atubangon ang tukmang mga kaso ubos sa Republic Act 9165 o Comprehensive Dangerous Drugs Act of 2002. — /IBM (BANAT NEWS)