Patrolcar nabalitok, usa naangol

CEBU, Philippines — Nasamdan ang civilian driver sa Guindulman Municipal Police Station human maaksidente ang police patrol truck nga iyang gimaneho sa National Highway sa Barangay Yanangan, Loay, Bohol, alas-4:20 sa kaadlawon niadtong Agosto 16, 2026.

Ang driver giila nga si Gerald, 35, ug residente sa Barangay Trinidad, Guindulman, Bohol.

Kauban niya sa patrol truck nagranggo ug Police Master Sergeant PMSg , aktibong miyembro sa Philippine National Police (PNP) nga naka-assign sa Guindulman Municipal Police Station wala ra maunsa.

Base sa spot report sa Bohol Police Provincial Office, ang mga personnel sa Guindulman Police Station padulong unta sa Tagbilaran City aron ihatud sa Crime Laboratory Office sa Bohol Provincial Police Office Headquarters ang request ug mga ebidensya nga may kalabotan sa ilang nahimong buy-bust operation.

Samtang nagbiyahe sa National Highway sa Barangay Yanangan, kalit nga giingong nakasinati og temporaryong pagkawala sa klarong panan-aw ang drayber.

Tungod niini, mitabok ang patrol truck sa pikas lane ug mibangga sa usa ka roadside post. Tungod sa impact, na-overturn ang Mitsubishi Strada LGU Guindulman Patrol Truck ug napahimutang sa kilid sa dalan. Nasamdan ang drayber ug giluwas dayon sa Loay Emergency Response Team, nga nagdala kaniya ngadto sa provincial hospital sa Tagbilaran City alang sa medical treatment. — /IBM (BANAT NEWS)