2 snatchers nga mag-e bike ,‘sikop

CEBU, Philippines — Duha ka 19-anyos nga lalaki nga giingong notadong nalambigit sa mga insidente sa pagpangawat ug pagpanglabni sa Colon area ang nasikop sa managlahing operasyon sa kapulisan sa Barangay Tejero, Cebu City, niadtong gabii sa Agosto 14, 2026.

Sumala sa impormasyon nga nadawat, giingong magsakay og e-bike ang mga suspek sa ilang paglibot sa Colon area aron mangita og biktima, ilabina kadtong naggamit og cellphone daplin sa dalan panahon sa kadlawon.

Gikatahong ilang hadlokon ang target pinaagi sa pagtion og armas ug dayon kuhaon ang cellphone o ubang bililhong butang.

Sa managlahing operasyon ubos sa Oplan Bulabog, unang nadakpan si alyas "Kent" 19, sa Sitio Sampanguita, Barangay Tejero, alas 11:50 sa gabii.

Nakuha gikan kaniya ang duha ka sachet sa gituohang shabu nga mokabat og 0.06 gramos, ingon man usa ka kutsilyo nga adunay gitas-on nga 5 hangtod 6 ka pulgada.

Paglabay og 40 minutos, nasikop usab sa Back Blessed, Barangay Tejero si alyas “Jhony,” 19.

Nasakmit gikan kang Jhony ang usa ka .38 caliber revolver nga walay serial number, nga adunay duha ka bala, ug duha ka sachet sa gituohang shabu nga mokabat og 0.06 gramos.

Giatubang sa duha ang kaso may kalabotan sa illegal drugs, samtang si Jhony giatubang usab og kaso ubos sa RA 10591 tungod sa armas. Gipadayon sa kapulisan ang imbestigasyon aron matino ang posibleng kalambigitan sa duha sa ubang insidente sa pagpangawat sa Colon area.