Nibaligya og ilegal nga sigarilyo nadakpan

CEBU, Philippines — Usa ka 27-anyos nga lalaki ang nadakpan human siya nakuhaan og kapin 1,500 ka reams nga ilegal nga sigarilyo kay dili kini dokumentado ug non-compliant nga sigarilyo sa buy-bust operation sa Barangay Poblacion Oriental, Consolacion, Cebu, niadtong gabii sa Agosto 14, 2026.

Giila ang nadakpan nga si Junsar Gulam Junni, 27,  lumad nga taga-Putik, Zamboanga City, ug nagpuyo sa Barangay Tugbungan, Consolacion.

Gipahigayon sa mga personnel sa PIU-CPPO ang operasyon alas 10:30 sa gabii diin unang gipalit sa poseur-buyer ang usa ka master case nga adunay 50 ka ream nga undocumented cigarette products nga nagkantidad og P20,000.

Apan atol sa transaksyon, nakita sa mga operatiba nga ang mga sigarilyo walay Graphic Health Warnings (GHWs) nga gikinahanglan ubos sa Republic Act 10643 o Graphic Health Warnings Law. Sa dugang mga pagsusi, nakit-an usab sa mga pulis ang laing 29 ka master cases nga adunay 1,450 ka ream sa assorted undocumented cigarettes nga giingong wala usab sa gikinahanglang graphic health warnings.

Apil sa mga nakumpiska ang 50 ka reams nga subject sa buy-bust transaction, usa ka bundle sa boodle money nga adunay genuine nga P1,000 bill, 29 ka master case sa undocumented cigarettes, ug usa ka yellow nga mini delivery van nga adunay plate number MAC 9010, nga giingong gigamit sa pagdala sa mga sigarilyo.

Gidala sa kustodiya sa kapulisan ang suspek ug gilauman nga pasakaan siya og tukmang kaso may kalabotan sa giingong paglapas sa RA 10643.

Padayon usab ang imbestigasyon sa mga awtoridad aron mahibal-an ang gigikanan ug posibleng mga kauban sa suspek sa pag-apod-apod sa undocumented nga mga sigarilyo.