Chameleons pinapak ng Foxies

MANILA, Philippines —  Humataw sina Ces Molina at Trisha Tubu ng tig-16 points para banderahan ang Farm Fresh sa 25-23, 25-13, 25-22 demolisyon sa Nxled sa 2026 Premier Volleyball League (PVL) On Tour kahapon sa Mindanao Civic Center Gymnasium sa Tubod, Lanao del Norte.

Nagdagdag si Royse Tubino ng 12 markers para sa 1-1 record ng Foxies na bumalikwas mula sa 17-25, 26-24, 19-25, 24-26 pagkatalo sa Galeries Tower Highrisers noong Hulyo 11 sa Batangas City.

Tumipa si setter Louie Romero ng 14 excellent sets para sa tropa ni Japa­nese coach Koji Tsuzurabara.

Minalas ang Chameleons na maiposte ang ikatlong sunod na panalo at nahulog sa 2-2 kartada.

Pumalo sina Myla Pablo at Fil-Am middle blocker MJ Phillips ng tig-walong puntos kasunod ang pitong marka ni Jonah Sabate-Escamillan para sa Nxled na iniwanan ng Farm Fresh sa 2-0.

Muling lumamang ang Foxies sa 8-3 sa third set hanggang maagaw ng Chameleons ang bentahe sa 21-19.

Bumangon ang Farm Fresh at kinuha ang 23-22 abante mula sa hataw ni Molina patungo sa match point matapos ang attack error ni Jovelyn Fernandez sa panig ng Nxled.

Ang service ace ni Risa Cruz ang tuluyan nang sumelyo sa unang panalo ng Foxies.

Samantala, sasalang kaagad si Jaja Santiago-Minowa para sa Creamline sa pagharap sa Choco Mucho sa ‘Rebisco Volleyball Sisterhood Showdown’, isang exhibition game na lalaruin ngayong hapon sa Aquilino Pimentel International Convention Center sa Cagayan de Oro City.

Nakakuha na si Santiago-Minowa ng professional license sa Games and Amusements Board (GAB) noong Biyernes para muling makalaro sa PVL.

Lalaro ang 6-foot-4 na dating Alas Pilipinas member para sa Cool Smashers sa darating na 2026 PVL Invitational Conference.