Operasyon sa CBRT mapadayon bisan walay estayonan diha sa Capitol

CEBU, Philippines — Mahimong mopadayon ang operasyon sa Cebu Bus Rapid Transit (CBRT) bisan walay estasyon diha sa atubangan sa Cebu Provincial Capitol, matud sa Cebu Provincial Government.

Kini samtang naghulat pa ang Kapitolyo sa Department of Transportation (DOTr) nga mopresentar og physical mock-up o computer-generated simulation sa gisugyot nga Capitol station.

Matud ni Atty. Ace Durano, provincial administrator nga wala pa sila makadawat og bag-ong komunikasyon gikan sa DOTr human sa ilang hangyo nga sundon ang mga requirement sa National Historical Commission of the Philippines (NHCP).

Ang unang kabalaka sa Kapitolyo mao ang epekto sa estasyon sa historical value ug view sa Cebu Provincial Capitol ilabi na ang linya sa panan-aw padulong sa landmark gikan sa Fuente Osmeña Circle.

Niadtong Abril 27, 2026, si Governor Pamela Baricuatro nipadayag nga kinahanglan og mas klarong visual representation sa estasyon aron ma-assess sa Kapitolyo ug NHCP kong makaapekto ba kini sa historical significance sa Capitol.

Si Durano nagkanayon nga ang mga drawing nga gisumite sa DOTr kaniadto dili igo aron klarong makita ang posibleng epekto sa estraktura.

Gitumbok ni Durano nga sukad pa sa sinugdanan klaro na ang posisyon sa gobernador nga kinahanglan masunod ang NHCP requirements sa dili pa ipadayon ang construction sa estasyon.

Bisan pa niini, gipadayag ni Durano nga walay problema sa operasyon sa BRT bisan wala pa ang estasyon diha sa atubangan sa Capitol.

Matud usab ni Durano nga mas importante nga magamit ang mga infrastructure nga nahimo na ug mapadayon ang operasyon sa BRT.

Iyang gipasabot nga ang gisugyot nga Capitol station pangkomportable lang sa mga pasahero ug dili kinahanglanon aron molihok ang BRT system.

Ug ang BRT project dili proyekto sa Cebu Provincial Government, proyekto kini Dakbayan sa Sugbo.

Samtang, niagi ang CBRT og dakong restructuring human gikansela sa World Bank ang $84.9 milyones nga financing human sa formal request sa Philippine government tungod sa dugay na’ng implementation delays.

Ug gumikan sa restructuring, gitang-tang ang Civil Works Packages 2 ug 3 ug nikunhod ang infrastructure budget gikan sa $255 milyones ngadto sa $47.4 milyones.

Ang nahibiling World Bank financing magtutok sa unang 2.38-kilometer phase lakip ang pipila ka land acquisition, engineering designs ug project supervision.

Ang mga sunod nga package wala mapadayon tungod sa delays sa right-of-way acquisition, samtang ang loan mo-expire na kini sa Septiyembre 30, 2026. (BANAT NEWS)