40 ka stalls sa merkado sa Minglanilla naugdaw

CEBU, Philippines — Moabot 40 ka stalls ang nasunog sulod sa Minglanilla Public Market o Ward 1 Market sa lungsod sa Minglanilla, Cebu, pasado alas 9:00 sa buntag niadtong Biyernes, Agosto 14, 2026.

Gibanabana sa Bureau of Fire Protection (BFP) Minglanilla nga mokabat sa P300,000 ang inisyal nga danyos sa maong sunog, apan mahimo pa kining mausab human makompleto ang assessment.

Matud sa BFP Minglanilla investigator nga si SO2 Wilmar Alicante, ang inisyal nga kantidad sa danyos gibase pa sa square-meter measurement sa naapektuhang lugar.

Matud pa ni Alicante, maghimo pa ang BFP og kompletong assessment aron matino ang kinatibuk-ang danyos sa mga stall ug uban pang kabtangan nga naapektuhan sa sunog.

Sa kasamtangan, wala’y na-report nga samdan kalabot sa maong insidente.

Sumala sa BFP Minglanilla, nadawat nila ang report bahin sa sunog alas 9:57 sa buntag ug mireponde dayun ang mga bombero ngadto sa merkado.

Tungod sa kalapad sa sunog, gipataas sa BFP ang alarma ngadto sa third alarm alas 10:05 sa buntag samtang paningkamotan sa mga bombero nga mapugngan ang pagkaylap sa kalayo ngadto sa ubang bahin sa merkado.

Alas 10:35 sa buntag dihang gideklarar sa BFP nga under control na ang sunog, sumala kang Minglanilla Acting Mayor Lheslen Abella Enad. Gideklarar usab sa BFP nga fire out na ang maong insidente alas 10:50 sa buntag.

Padayon ang assessment sa BFP aron matino ang aktuwal nga kantidad sa danyos, samtang nagpadayon usab ang imbestigasyon aron mahibal-an ang gigikanan ug hinungdan sa sunog. (BANAT NEWS)