Marcos mopili’g kandidatong haom

CEBU, Philippines — Gipahibalo ni Presidente Bongbong Marcos nga ang ituboy niya sa umaabot nga 2028 presidential elections, kandidato nga mopadayun sa nasugdan sa iyang administrasyon nga paggukod ug pagpabilanggo sa mga kurakot ug kadtong padayunon ang kasamtangang nagpadayung mga programa para sa kaayohan ug benepisyo sa mga Pilipino.

Iyaha ning pamahayag human nigawas ang survey nga nagpakitang leading si Vice President Sara Duterte sa surveys sa pagka-presidente karong 2028.

Matud pa niya, bisan pa anang survey dili gyud ana maimpluwensiyahan ang iyang buhatong mga desisyon o makadiktar sa mga polisiyang buot ipatuman sa iyang administrasyon.

Hinuon, giangkon ni Marcos nga padayun pa niyang gipangita kung kinsa ang potensyal nga kandidatong iyahang ituboy ug paluyohan, wala pa sab sila nagsugod og diskusyon bahin ani.

Gipahibalo hinuon niya nga ang iyang political party, ang Partido Federal ng Pilipinas, mahimong makig-alyansa sa ubang political parties o mohimo og ilang kaugalingong lineup.

"We will certainly provide the best candidate for the betterment of the lives of every Filipino," matud pang Marcos sa report sa One PH.

Pokus sa trabaho

Samtang giila niya ang mga resulta sa mga surveys, apan sa iyang tan-aw wala pa ni kapuslanan karong mga panahona tungod sa pagusab-usab sa mga kalamboan sa politika sa dili pa maabot ang 2028.

Para niya, sayo pa kaayo kung mopili siya karon og kandidato, ilaha lang una panid-an ang politika ayha sila maghimo og desisyon.

“I don't change my decision because of the survey. I don't change direction because of the survey. I take a decision because what I feel is the proper decision to make,” sumala pa ni Marcos kansang administrasyon niani og mga pagsaway gumikan sa polisiya, desisyon ug pamaagi nakaligis sa iyang mga kritiko.

Sumala pa niya, kaning mga polisiya sa gobiyerno karon gibuhat ni tungod kay daghan iyang nakita nga makabenepisyo,  bisan pa og mosaka o mohagsa siya sa surveys dungan sa pag-angkon nga makapahiubos kaayo ang pagtibugsok sa iyang ratings. Sa pagkakaron, mas iyahang tutokan ug paningkamotan nga tarong ang iyang pagdumala sa nasud ug dili nang mga numero sa surveys. —IBM