3-meter easement zone gusto ipatuman sa Pasil

CEBU, Philippines — Giklaro ni Barangay Kapitan Francisco de Gracia Jr. sa Barangay Pasil sa Cebu City nga walay molupyo daplin sa sapa nga naa sa sulod sa 3-meter easement zone ang pugsanong papahawaon kun mapatuman kining programa sa Guadalupe River.

Matud pa niya naporma sa kanhi administrasyon sa barangay ang proyekto nga pagpatuman sa mandatory three-meter easement sa sapa.

Sa pagpakighinabi ngadto kang de Gracia, siya niingon nga tuig 2023 siya milingkod pagka barangay kapitan ug sa kasamtangang administrasyon lang giduso ang resolusyon ngadto sa kagamhanan sa Dakbayan sa Sugbo.

Ang Barangay Pasil nihangyo sa kagamhanan nga ipatuman ang mandatory 3-easement zone  sulod sa ilang barangay aron mas mapalig-on ang pangontra sa baha, matangtang ang mga ilegal nga estruktura, mapanalipdan ang kinaiyahan ug mamentinar ang kalimpyo sa sapa.

Matud pa ni de Gracia nga bahaonon ang ilang barangay ilabi na kung mobunok ang uwan ug kung high tide ang dagat.

Pinaagi sa Barangay Resolution No. 2026-06-89, giaprobahan sa Sangguniang Barangay sa Pasil ang pagpadala og usa ka transmittal niadtong Hulyo 10, 2026 ngadto kang Mayor Nestor Archival, Bise Mayor Tomas Osmeña ug sa mga miyembro sa Sangguniang Panlungsod.

Nihangyo sila og pundo ug makig-alayon sa mga hingtungdan nga departamento ug ahensya aron mapadali ang implimentasyon sa 3- meter easement sa sapa.

Nalatid sa resolusyon, ang gikinahanglan nga pundo itagana alang sa pag-survey, clearing operations, relocation assistance, rehabilitasyon, ug uban pang gikinahanglan alang sa epektibong implementasyon sa proyekto.

Wala hinuon siya mohatag og kantidad kung pila ang gikinahanglang pundo sa maong proyekto tungod kay ang inisyatiba gikan pa sa miaging administrasyon.

Kung mapatuman ang proyekto, gilauman nga mas dali na ang regular maintenance, dredging ug desilting operations, pagpalig-on sa disaster risk reduction ug climate resilience programs sa siyudad, ug pagpanalipod sa kinabuhi ug kabtangan sa mga residente nga kanunay maapektuhan sa pagbaha.

Giklaro sab sa kapitan nga kung ipatuman ang proyekto, walay mahitabo nga pinugsanay nga pagpapahawa sa mga residente nga nagpuyo daplin sa sapa.

Ang kapitan nagkanayon nga gipahimangnuan na sa miaging administrasyon ang mga posibleng maapektuhan sa tulo ka metros nga easement.

Ang hangyo sa barangay gisumite pa karon sa Committee on Laws, Styling ang Ordinances ug sa Committee on Housing sa konseho aron masuta ang legal nga basehan sa pagka-aplikar sa mandatory three-meter easement lakip na ang pagtuon sa mga probisyon sa Water Code ug uban pang mga balaod.

Kung maaprubahan kini, ang implimentasyon sa proyekto anaa sa kamot sa kagamhanan ug dili sa barangay. (BANAT NEWS)