Gisuwayag sunog ang asawa

CEBU, Philippines — Gidakop sa kapulisan ang usa ka 46-anyos nga e-bike driver human giingong gihulga og kutsilyo ug gisulayag sunog ang iyang asawa diha sa Sitio Lower Tabucanal, Barangay Pardo, Cebu City.

Ang suspek nga giilang alyas “Okoy” anaa karon sa kustodiya sa Inayawan Police Station 7 ug nag-atubang og reklamo tungod sa giingong paglapas sa Republic Act No. 9262 o Anti-Violence Against Women and Their Children Act of 2004. Ang iyang asawa, nga giilang alyas “Brenda,” 46-anyos usab mao ang giingong biktima sa insidente.

Base sa police report, nahitabo ang insidente human makapauli si Brenda gikan sa iyang trabaho isip dishwasher sa usa ka mall.

Didto, giingong giatubang siya sa suspek gawas sa pinuy-anan sa iyang amo ug gigunitan sa suspek ang sinina sa biktima dayun gitionan og kutsilyo.

Misulay usab kuno siya sa pagsunog sa biktima ug maayo nalang nga nakadagan siya palayo ug nidiretso sa barangay hall aron mangayo og tabang.

Sumala pa sa police report, nasuko kuno ang suspek tungod sa iyang pagduda nga adunay laing karelasyon ang iyang asawa nga giila niini nga alyas “Opok.”

Matud pa sa report, sulod na sa mga duha ka bulan nga nagdumili si ang ginang nga makighilawas sa suspek gawas kun hatagan siya niini og kantidad nga P800 hangtod P1,000.

Human sa insidente, nasikop sa kapulisan ang suspek ug gidala sa Inayawan Police Station 7, diin nagpabilin siya sa kustodiya samtang gipadayon ang imbestigasyon ug proseso sa reklamo batok kaniya. Ang kaso giatubang ubos sa VAWC law, samtang ang mga sirkumstansiya sa insidente padayong giimbestigahan sa kapulisan. (BANAT NEWS)