Wala maghuna-huna sa kaugmaon sa relasyon

Dear Tito Miguel,

Maayong adlaw ,  ako diay  si Alex , taga Barangay Tisa, Cebu City.

Duna ko’y uyab nga ginganlan og Samantha , usa ka tuig na ang among relasyon. Pipila ka buwan na usab mi nga nag-ipon og puyo.

Love nako si Samantha, pero adunay mga butang nga dugay na nakong gikabalak-an. Usa niini ang iyang kanunay nga pagka-late  sa trabaho ug sige og absent. Usahay, murag dili niya seryosohon ang iyang responsibilidad sa trabaho, ug ako ang mabalaka sa iyang kahimtang ug sa mahimong epekto niini sa among kaugmaon.

Dili lang kana, kay kasagaran pud, sobra siya ka-dependent nako, labi na sa pinansyal nga aspeto. Kung adunay kinahanglanon o gasto, kasagaran ako ang iyang duolon. Wala man ko nagmahay sa pagtabang kaniya kay uyab nako siya, pero usahay makahunahuna ko kung hangtod kanus-a nako ni kinahanglan nga  buhaton. Nahadlok ko nga basin maanad siya nga ako pirmi ang mosalo sa iyang mga responsibilidad. Gusto nako nga makat-on siya nga mahimong independent, responsable, ug makabarog sa iyang kaugalingon.

Mao nga akong pangutana: Unsaon nako pagsulti kang Samantha nga kinahanglan na siyang mahimong mas responsable sa iyang trabaho ug pinansyal nga kahimtang, nga dili siya malain? Ug sakto ba nga magbutang ko og limitasyon sa akong pinansyal nga pagtabang kaniya? — Alex

* * *

Alex,

Kun plano nimo minyoan siya, ingna kinahanglan samtang sayo pa magtigom namong duha para sa inyong kaugmaon ug umaabot nga pamilya. Mabuhat lang ni ninyo kun duna mo’y steady income ug responsable sa pag gasto niini. Ingna ka’y kun ikaw ra usa, dili nimo kaya ipatuman inyong mga plano ug pangandoy sa kinabuhi. Kun dili kamo’y tag-iya sa inyong gipuy-an karon, agniha nga magtigom mo para makapalit mo’g yuta, balay ug sakyanan sa umaabot.

Ingna magtigom mo’g pareha nga kantidad kada buwan sa banko. Ayaw sa joint account kay delikado. Unya’g magkabuwag mo? O dili ba kaha sige lang siya’g withdraw wala ka kahibalo? Lain lain lang nga account, apan inyong ipakita sa usa’g usa kada buwan kun pila na inyong natigom. Sa maong paagi, lagmit magtinarong siya sa iyang trabaho, mahimong responsable sa paggasto ka’y duna na man mo’y tumong ug tinguha sa kinabuhi. Kun unahon ninyo ang pagtigom sa dili pa ang mga gastoson, madisiplina gyud mong duha. Mapugos mo’g tigom, dili na magpataka’g palit sa dili importante.

Paniid sa iyang reaksyon. Kun mosugot nga madasigon, dako ang purohan nga mausab siya. Inspirasyon ra diay ang kuwang niya. Kun magsige’g rason nga lisod buhaton, wa gyud siya’y plano magtinarong. Angay na ka magduha duha, bug-at siya nga bagahe, dili katimbang sa kinabuhi. Samot na’g dili ka seryoso niya, ayaw na’g usik sa laway ug panahon nga istoryahon siya. Biya na. Dili siya maayo nga kapikas, kanimo siya pa ang mopikas-pikas.Tito Miguel

Magpatambag ka? Ipada kang Tito Miguel: 0991-318-9366