Eala-Jovic magtutuos sa exhibition match
MANILA, Philippines — Lalabanan ni Pinay tennis star Alex Eala ang kanyang matalik na kaibigang si American netter Iva Jovic sa isang exhibition match sa Stars of the Open sa Agosto 27 sa Arthur Ashe Stadium.
Ang nasabing charity event ay taunang ginagawa kasabay ng US Open Fan Week sa New York City.
Magtutuos sina Eala at Jovic sa isang race to six games match kung saan determinado ang Pinay tennis ace na resbakan ang American player na tumalo sa kanya ng dalawang beses sa mga WTA Tour na French Open at HSBC Championships.
Lalaro rin sa charity event sina Americans Amanda Anisimova, Alex Michelsen, at Learner Tien, Ukrainian Marta Kostyuk, Brazilian Joao Fonseca at Frenchman Arthur Fils.
Ang apat na singles matches ay bahagi ng inisyatibo ng United States Tennis Association (USTA) Foundation kung saan ang parte ng ticket sales ay mapupunta sa tennis at educational programs para sa mga mahihirap.
Ilang beses na ring nagtambal sina Eala at Jovic sa doubles event at nakatakdang sumalang sa WTA 1000 Cincinnati Open sa Mason, Ohio.
Sa Cincinnati Open lalabanan ni Eala sa second round bukas (Manila time) ang sinuman kina Magda Linette ng Poland o Elena-Gabriel Ruse ng Romania sa Lindner Family Tennis Center sa Mason, Ohio.
Nakakuha ang 21-anyos na si Eala ng first round bye bilang No. 17 seed sa torneo.
Nagmula si Eala, umakyat sa No. 20 sa WTA Tour world rankings, sa round of 16 exit sa WTA 1000 National Bank Open sa Toronto, Canada matapos matalo kay Belinda Bencic ng Switzerland, 4-6, 0-6, noong Lunes.
Nakamit ni Eala ang kanyang kauna-unahang WTA crown sa pagrereyna sa 2026 Mubadala DC Open sa Washington kung saan niya tinalo si American Jessica Pegula sa finals.
- Latest
