16 ka kahon nga isdang pinabuthan sakmit
CEBU, Philippines — Niabot ngadto sa 16 ka kahon sa nagkadaiyang klase sa isda ang nasakmit atol sa joint market denial operation nga gipahigayon sa Cebu City Bantay Dagat Commission, Bureau of Fisheries and Aquatic Resources (BFAR)-7, Cebu City Department of Veterinary Medicine and Fisheries (DVMF), PNP Maritime Police ug Philippine Coast Guard (PCG) sa Bantay Dagat Base diha sa South Road Properties niadtong Martes.
Ang mga isda gilangkuban sa 175 ka kilo nga tabangko, 175 ka kilo nga solid, 70 ka kilo nga dalagang bukid, 70 ka kilo nga katambak o kiros ug 70 ka kilos nga mamsa.
Ang mga kinahon nga isda gisuwayan og pagpasulod sa merkado apan wala kini nakapasar sa standard sa kalidad nga mamahimong mabaligya diha sa merkado.
Base sa taho sa Bantay Dagat Commission nga ang tanang isda nagpositibo sa timailhan nga gipabuthan o nakuha pinagi sa dynamite fishing sa usa ka mananagat nga wala gihinganlan sa buhatan.
Ang dynamite fishing usa ka pamaagi nga makadaot sa marine ecosystem.
Ang tanang nasakmit nga isda gi-turnover ngadto sa PNP Maritime Police alang sa dokumentasyon, imbestigasyon ug dugang evidence processing aron nga mapatuman ang legal nga aksyon subay sa kasamtangang balaod ug regulasyon sa pagpanagat.
Human sa imbestigayon sa PNP Maritime Police, i-turnover ang maong mga isda ngadto sa Bureau of Jail Management and Penology (BJMP). Padayon ang kagamhanan sa pagpalig-on sa pagpakigbatok sa ilegal nga pamaagi sa pagpanagat aron mapreserbar ang kadagatan ug mapanalipdan ang panginabuhian sa mga mananagat.
Gipasalig usab sa DMVF nga pahugtan pa ang pag-monitor sa mga merkado ug fish port aron malikayan ang pagbaligya og mga delikadong isda ug maprotektahan ang mga konsumidor. — (BANAT NEWS)
- Latest
