Pasil nangayo og pundo sa pagpatuman sa 3-meter easement

CEBU, Philippines — Nangayo og pundo ang Barangay Pasil ngadto sa kagamhanan sa Dakbayan sa Sugbo aron mapatuman ang 3-meter easement sa sapa sa Guadalupe tungod kay kinahanglan nga pangtangtangon ang ilegal nga istraktura ug mas palapdan pa ang agianan sa tubig aron adunay pangontra sa baha.

Ubos sa maong hangyo, gipasabot sa barangay nga gikinahanglan ang pundo alang sa mga pagdeterminar sa hustong utlanan sa tulo ka metros nga easement, pagpahigayon og clearing operations pinaagi sa pagtangtang sa mga istraktura nga gipangtukod daplin sa sapa.

Kinahanglan usab niini ang relocation assistance isip tabang sa mga pamilya ug lumolupyo nga maapektohan sa paghawan.

Apil sa pundohan ang pagmentinar ug pagpanindot sa sapa ug sa palibot niini.

Gipadayag sa konseho sa barangay nga ang pagpatuman sa easement maghatag og daghang maayong epekto sa barangay sama sa paghatag og igong kabutangan sa tubig-baha panahon nga kusog ang pag-uwan.

Makahatag usab kini og loag nga agianan alang sa mga ahensiya sa gobiyerno nga magpahigayon og dredging, desilting, paglimpiyo, pag-inspeksyon, ug rehabilitasyon sa sapa ug mas paspas ug sayon ang pagpahigayon og rescue ug emergency operations panahon sa mga kalamidad ug makatabang kini batok sa soil erosion ug malimpiyohan ang sapa sa Guadalupe.

Si Kapitan Francisco de Gracia, Jr. nagkanayon nga natuki kini sa ilang barangay niadtong Hunyo 17, 2026 ug nagpadala sila og suwat hangyo ngadto sa buhatan ni Mayor Nestor Archival, Sr., Bise Mayor Tomas Osmeña ug konsehales niadtong Hulyo 10, 2026.

Matud ni de Gracia nga wala pa usab siya makahatag og kantidad nga kinahanglan alang sa 3-meter easement.

Nanghinaot si de Gracia nga maaprobahan ang pagpatuman sa proyekto ug motabang ang kagamhanan nga mapatuman ang maayong tumong tungod kay kanunay’ng makasinati ang barangay og pagbaha ilabi na kong high tide ug kong kusog ang uwan.

Sa pagkakaron, gi-refer una kini sa Committee on Laws and Styling ug Committee on Housing aron masuta ang legal nga basehan sa pagka-aplikar sa mandatory 3-meter easement lakip na ang pagtuon sa mga probisyon sa water code ug uban pa’ng mga balaod. — (BANAT NEWS)