PRC: duna pay igong supply sa dugo sa Probinsiya sa Sugbo

CEBU, Philippines — Aduna pay igo nga suplay sa dugo bisan misaka ang kaso sa dengue sa Cebu Province, apan anaa lamang kini sa minimum safe level.

Kini matud pa ni Philippine Red Cross Cebu Chapter Administrator Atty. Vera G. De Jesus-Pater, ug miingon nga igo ang suplay aron matubag ang mga pasyenteng nanginahanglan og dugo, apan dili kini sobra sa gikinahanglan.

Mga 50 ka units matag blood type ug blood component ang ilang giisip nga minimum sufficient inventory. Naglakip kini sa whole blood, packed red blood cells, platelets, fresh frozen plasma ug cryoprecipitate.

Lima ka dengue patients nga nanginahanglan og blood transfusion ang natabangan sa PRC-Cebu sa miaging mga semana. Apan gipadayag ni Vera nga dili tanang dengue patients nanginahanglan og dugo, kasagaran kadtong anaa na sa critical stage.

Padayon ang PRC-Cebu Chapter sa hapit adlaw-adlaw nga bloodletting activities aron mapun-an ang ilang suplay. Sa panahon nga gamay ang donors, mokolekta sila og 80 hangtod 100 ka bags sa dugo matag semana, apan mahimong moabot og 200 ka bags kung daghan ang donors.

Giawhag ni Vera ang mga Cebuanos nga kanunay magdonate og dugo ug dili maghulat nga adunay emergency aron mangita og donors.

Giklaro usab niya nga dili awtomatikong bawal ang senior citizens sa pagdonate. Ang mga 60 anyos mahimong makadonate basta himsog ug physically fit, samtang ang mga 61 hangtod 65 anyos susihon base sa ilang kahimtang sa panglawas ug donor history.

Samtang, mikabat na sa 1,953 ang dengue cases sa Cebu Province gikan Enero hangtod unang semana sa Agosto, diin 14 ang namatay ug 1,939 ang naayo.

Pinakataas ang kaso niadtong Hulyo nga mikabat sa 582, lakip ang tulo ka namatay. Sa unang semana sa Agosto, 271 ka kaso ug usa ang natala nga namatay.

Ang datos wala maglakip sa Cebu City ug Lapu-Lapu City ug nagrepresentar lamang sa mga natala nga kaso, dili sa kasamtangang active cases. Giawhag gihapon ang publiko nga wagtangon ang mga dapit nga mahimong pundohan sa  lamok, ilabina ang mga lugar nga adunay stagnant water.

Para sa gustong magdonate o mangutana bahin sa blood services, mahimong kontakon ang PRC-Cebu Chapter sa 0922-419-7780. — (BANAT NEWS)