Miss Comaneci kikilatisin sa 3YO Maiden race
MANILA, Philippines — Masusubukan ang husay ng Miss Comaneci pagsalang nito sa 3-Year-Old & Above Maiden race (Placers) na ilalarga sa pista ng Philippine Jockey Club sa Padre Garcia, Batangas bukas (Biyernes).
Makakatagisan ng bilis ng Miss Comaneci ang siyam na mahuhusay na kalahok sa distansyang 1,200 meter race kung saan ay nakalaan ang P15,000 added prize para sa winning horse owner.
Sasakyan ni jockey Jomer Estorque, makakalaban ng Miss Comaneci ang Mishani Soul, I Told Mama, Energetic, Make Waves, Pennylass, Incy Vincy, Mishani Lethal, Royal Dash at Dagitab.
Inaasahang magbibigay ng magandang laban sa Miss Comaneci ang Dagitab na rerendahan ni veteran rider Mark Angelo Alvarez at Mishani Soul na papatungan ni reigning Philippine Sportswriters Association, (PSA) -Jockey of the Year awardee Jonathan Basco Hernandez.
Pakakawalan ang nasabing karera sa pangalawang race sa alas-6:10 ng gabi kung saan ay simula ng tayaan sa winner take all (WTA) at may laro din sa forecast, daily doubles, trifecta, quartet at super six.
Samantala, may walong karera ang inihanda ng pamunuan ng Philippine Jockey Club Inc. (PJCI) ngayon.
- Latest
