2 table tennis events hahataw sa Puerto Princesa

MANILA, Philippines — Higit sa 600 atleta mula sa 20 bansa ang hahataw sa dalawang internatio­nal table tennis events na pamamahalaan ng Puerto Princesa sa Setyembre.

Ito ay ang World Table Tennis Youth Contender Series sa Setyembre 3 hang­­gang 6 at ang World Table Tennis Feeder Series sa Setyembre 8 hanggang 12 sa Edward S. Hagedorn Coliseum.

“Malaking tulong ang mag-host ng isang international event dito sa ating bansa. Una, dahil ma-minimize natin ‘yung gastos and at the same time, makakalaban mo ‘yung mga world-class players,” ani Philippine Table Tennis Federation Inc. president Ting Ledesma sa Philippine Sportswriters Association Forum kahapon sa Philippine Sports Commission media room.

Isasabak ng PTTF ang 60 atleta sa pamumuno ni national team member Kheith Rhynne Cruz kasama ang isang tropa mula sa Puerto Princesa.

Itatampok sa Youth Series ang 19-and-under athletes na lalahukan ng 426 entries, habang may 165 entries sa Feeder Series na isang open category.

Ang mga kategorya ay nahahati sa U-11, U-13, U-15, U-17 at U-19 para sa boys at girls at ang mixed doubles ay U-15 at U-19 categories.

Lalahok sa Youth Series ang Australia, Canada, Germany, Hong Kong, Indonesia, India, Italy, Japan, Korea, Malaysia, Maldives, New Zealand, Singapore, Thailand, Chinese Taipei, USA, Oman, Brunei at Slovakia.

Sa Feeder Series kasali ang Algeria, Australia, Bahrain, Canada, Denmark, France, Germany, India, Italy, Japan, Korea, Malaysia, Netherlands, Chinese Taipei, Oman, Brunei, Slovakia at Indonesia.