Eala nanamilit na sa Canadian open

CEBU, Philippines — Natuldokan na ang kampanya ni Alex Eala nga makalangkat og laing korona.

Kini human ang Pinay tennis star miyukbo ngadto ni world No.14 Belinda Bencic sa Switzerland sa ikaupat nga hugna sa WTA1000 National Bank Open kagahapong adlawa didto sa Sobeys Stadium sa Toronto, Canada.

Ang world No.20 nga si Eala gipayaka sa sunod-sunod nga sets 4-6, 0-6 sa 2020 Tokyo Olympics gold medalist nga si Bencic.

Human nabiyaan og dos puntos sa unang set, si Eala mipuwersa og 4-4 nga panagtabla apan si Bencic mikadlit og duha ka sagunson nga puntos aron pagposte og 1-0 nga bentahe.

Dominado na kaayo ni Bencic ang ikaduhang set diin iyang giserohan ang 21-anyos nga si Eala aron pag-abante sa quarterfinals.

Ang 29-anyos nga si Bencic mipatikangkang ni Eala sud lamang sa 73 minutos alang sa ika-10 niyang sagunson nga daog batok sa walhon nga mga kontra.

Sangkaon niya sunod ang Amerikanang world No.4 nga si Coco Gauff alang sa luna sa semifinals. Si Gauff mitikang sa Last 8 human gitagak ang Russian teenage qualifier nga si Alina Korneeva, 6-3, 6-1.

Samtang naputol ang pito ka sunod-sunod nga daog ni Eala human naparot sa ikaduha pa lamang nga higayon sa miagi niyang 12 ka duwa sukad sa Wimbledon.