Modernisasyon sa Traffic Command Center prayoridad sa dakbayan

CEBU, Philippines — Nagpadayon ang paningkamot sa Kagamhanan sa Dakbayan sa Sugbo alang sa pagpalambo sa sistema sa transportasyon pinaagi sa pagsalmot sa ASEAN Smart Cities Network (ASCN). Ang ASCN usa ka inisyatiba nga gisuportahan sa gobyerno sa Australia pinaagi sa Aus4ASEAN Futures Initiative ug sa UN-Habitat. Prayoridad sa proyekto ang modernisasyon sa Traffic Command Center aron mapalig-on ang pagmonitor sa kahimtang sa trapiko, mas mapaspas ang pagtubag sa mga emerhensiya ug disgrasya sa kadalanan, ug mas mohapsay ang lihok sa mga sakyanan ug pasahero sa nagkadaiyang bahin sa siyudad. Tumong sab sa proyekto ang pagpalambo sa urban mobility, pagpalambo sa kaluwasan ug seguridad sa publiko, ug pagtukod og mas adunay integridad nga sistema sa transportasyon nga makaserbisyo sa mga bisita ug residente sa siyudad. Ang maong inisyatiba kabahin sa mas lapad nga paningkamot sa ASEAN, Australia, ug UN-Habitat sa pagsuporta sa malungtarong urbanisasyon sa rehiyon pinaagi sa pagtabang sa mga lokal nga kagamhanan sa paghatag og mga bag-o nga solusyon sa mga hagit nga gi-atubang ilabi na sa transportasyon.

Samtang gisaulog sa ASEAN ang ika-59 nga anibersaryo niini, ang aktibong partisipasyon sa siyudad sa ASEAN Smart Cities Network nagpakita og mahinungdanong papel sa mga lokal nga kagamhanan sa pagpalambo sa kooperasyon ug aron nga makakuha og pagtulun-an aron nga magmalambuon ang dakbayan. Pinaagi sa maong partnership, gipakita sa siyudad ang padayon nga paningkamot niini sa paggamit sa modernong teknolohiya ug internasyonal nga kooperasyon aron masulbad ang mga hagit sa transportasyon ug mapauswag ang kalidad sa kinabuhi sa mga lumulupyo sa umaabot nga mga tuig. (BANAT NEWS)