Flood control projects sa Sugbo ipasusi ni Remulla

CEBU, Philippines — Ipasusi ni Ombudsman Jesus Crispin “Boying” Remulla ang mga flood control project sa Sugbo tungod sa balik-balik nga pagbaha bisan pa sa kapin P60 bilyones nga pundo nga gigahin alang niini sulod sa niaging unom ka tuig.

Matud ni Remulla nga susihon ang maong mga proyekto kong nisubay kini sa disenyo, construction ug implementasyon ang problema o kong adunay korupsiyon.

Susihon usab ang mga alegasyon sa ghost ug substandard projects, double counting ug mga iregularidad sa bidding ug implementasyon lakip ang mga proyekto nga nalambigit ang DPWH officials, district engineers ug contractors.

Kalabot sa giingong ghost project sa Cebu 3rd district, si Remulla nagkanayon nga unang susihon ang tanang dokumento ug gamiton ang digital tools aron ma-validate pagsuta sa kamatuorn kong substandard ang proyekto.

Gipadayag ni Remulla nga dili magdali ang Ombudsman sa pagpasaka og kaso ug kinahanglan una og igo nga ebidensiya.

Gipahibalo ni Remulla ang plano nga modugang og 20 ka abogado sa Ombudsman-Visayas aron mapalig-on ang fact-finding, criminal investigation ug prosekusyon.

Gipasiugda usab ni Remulla ang transparency sa mga transaksiyon sa gobyerno pinaagi sa mas lapad nga paggamit sa digital technology, lakip ang pagrekord sa bidding ug pag-access sa impormasyon sa gobyerno gikan sa barangay hangtod sa national level.

Matud usab ni Remulla nga tumong sa Ombudsman nga dili lang ang pag-target sa mga indibiduwal apan ang pagdala og kausaban sa sestema ug pagpahiuli sa pagsalig sa publiko.

Ang Mananga River usa sa mga lugar nga gisusi ni Remulla atol sa iyang unang pagbisita sa Sugbo isip Ombudsman ug nakigkita usab siya sa opisyales ug empleyado sa Office of the Ombudsman–Visayas nga nakabase sa Dakbayan sa Sugbo. (BANAT NEWS)