Heavy Bombers miangkon og luna sa finals

CEBU, Philippines — Ang Jose Rizal University (JRU) Heavy Bombers nakalingkawas sa University of Cebu (UC) Webmasters, 85-81, aron pagpabiling way pildi sa Cebu City Collegiate Invitational Basketball Tournament 2026 niadtong Sabado, Agosto 8, sa Cebu City Sports Institute sa Barangay Sawang Calero.

Si Sean Salvador mikadlit og 19 puntos, si Jamir Eligado miposte og double-double nga 14 puntos ug 10 rebounds, samtang si Christopher Hubilla miamot og 13 puntos, unom ka rebounds ug duha ka assists alang sa Heavy Bombers, nga segruado na og luna sa kampiyonato uban ang perpektong 3-0 rekord.

Ang Heavy Bombers namugnaw human milansang og 27 puntos nga labaw, 43-16, sa ikaduhang kuwarter hinungdan nga ang Webmasters nakasikit ngadto na lang sa kuwatro puntos, 55-59, sa sayong bahin sa second half.

Dali hinoon nga nabalik sa JRU ang double-digit nilang bentaha, apil na sa iskor nga 80-68 sa pinal nga singko minutos ug dayon mipakgang sa madasigon nga rally sa UC sa endgame aron pagipsot ngadto sa kuwatro puntos nga kadaogan.

Si Ricofer Sordilla mipabuto og 22 puntos samtang sila si Maverick Eligoyo ug VJ Baruc nagkumboya'g 23 puntos apan sa way kapuslanan kay ang Webmasters natagak sa 1-1.

Sa laing duwa, ang University of the East (UE) Red Warriors miputo sa duha ka sagunson nilang malas uban ang 82-70 nga pagpakaging sa Cebu Schools Athletic Foundation, Inc. (CESAFI) four-peat champions University of the Visayas (UV) Green Lancers, 82-70.

Ang Red Warriors wala na molingi pa sukad sila misutoy sa mainit nga sinugdanan, 25-7, nga ila pang gipaburot ngadto sa 26 puntos, 60-34, sa naghinapos nga bahin sa ikatulong kuwarter.

Si Mariano Tanedo ang nangu sa UE bitbit ang 17 puntos, upat ka rebounds, duha ka assists ug duha ka steals samtang si Christopher Lagat midonar og 12 puntos, tulo ka rebounds, usa ka assist ug usa ka steal.

Si Zylle Cabellon maoy bugtong double-digit scorer uban ang 11 puntos alang sa Green Lancers, nga nakatilaw sa una nilang pildi sa duha ka duwa.