Nangihi, natagak sa pangpang

CEBU, Philippines —  Usa ka 28 anyos nga babaye nga giingong nitubag sa sugo sa lawas ang aksidenteng nahagbong sa pangpang nga may gilawmong 60 ka tiil diha sa Sitio Grahe, Barangay Busay, Cebu City, alas-2 sa hapon niadtong Biyernes, Agosto 7, 2026.

base sa report sa DySS,  giila ang babaye  nga residente sa Barangay Apas, Cebu City. Base sa impormasyon nga gihatag ni Busay Barangay Captain Yody Sanchez ug Konsehal Jun Lopez, nangihi ang biktima sa bakilid sa dihang kalit kining naligas ug natagak sa pangpang.

Kapin usa ka oras nga gipangita ang biktima sa mga rescuers didto sa ubos samtang galain ang panahon. Giingong naka-inom sa wala pa kini natagak sa maong pangpang.

Mitabang sa rescue operation ang mga sakop sa Busay Emergency Action Team (BEAT), Disaster Team sa Cebu City ug Bureau of Fire Protection (BFP) 7.

Nakaangkon ang biktima og mga bali sa lawas ug samad sa ulo tungod sa pagkahulog ug gidala siya sa Vicente Sotto Memorial Medical Center. Padayon ang gi-monitor ang kahimtang niya karon. (BANAT NEWS)