R.O.W., ARNEC nag-alayon aron paglig-on sa mga bata

CEBU, Philippines —  Nagtambayayong ang R.O.W. Initiative ug ang Asia-Pacific Regional Network for Early Childhood (ARNEC) aron mapalig-on ang social-emotional well-being ug resilience sa gagmay’ng bata sa mga komunidad nga naapektuhan sa kalamidad sa Talisay City, Cebu.

Pinaagi sa memorandum of understanding (MoU), pormal nga gilusad ang Social-Emotional Learning for Early Childhood Resilience Program, nga motabang sa mga bata, early childhood care and education (ECCE) teachers, ginikanan, caregivers ug komunidad nga naapektuhan sa mga kalamidad.

Ipatuman ang pilot program sa mga piniling barangay sa pakigtambayayong sa Talisay City Government.

Matud ni R.O.W. Initiative founder Kimberley Therese Burden-Gothong, importante ang partnership tungod kay ang pagbangon human sa kalamidad dili lamang bahin sa pagtukod pag-usab sa mga nadaot, kondili apil usab ang pagtabang sa mga pamilya ug mga bata nga makabawi sa emosyonal nga aspeto.

Gitukod ang R.O.W. niadtong Nobiyembre 2025 isip tubag sa epekto sa Bagyong Tino.

Samtang, gipadayag ni Talisay City Mayor Samsam Gullas ang kamahinungdanon sa pakigtambayayong sa ubang organisasyon aron matubag ang mga panginahanglan sa komunidad.

Matud ni Gullas, dili mahimong ang lokal nga pangagamhanan lamang ang mosulbad sa tanang problema sa siyudad.

Ubos sa partnership, dad-on sa ARNEC ang iyang regional expertise sa early childhood development, samtang ang R.O.W. Initiative motambayayong sa network ug sa city government aron mapalig-on ang social-emotional learning ug resilience sa mga bata.

 Ang programa maghatag sa ECCE teachers og praktikal nga mga pamaagi aron matabangan ang mga bata nga makabalik sa ilang naandan nga lihok ug makasagubang sa epekto sa kalamidad. Suportahan usab ang mga ginikanan, caregivers ug komunidad sa disaster preparedness, response ug recovery.

Gilauman sa mga partner nga ang pilot program sa Talisay mahimong sinugdanan sa mas malungtarong paningkamot aron matabangan ang mga bata, pamilya ug komunidad nga mas maandam ug mas lig-on sa pag-atubang sa umaabot nga mga kalamidad. (BANAT NEWS)