Heavy Bombers 2-0 na, Lancers nakaipsot sa Cheetahs

CEBU, Philippines —  Ang Jose Rizal University (JRU) Heavy Bombers mipakaging sa University of the East (UE) Red Warriors, 78-66, alang sa ikaduha nilang sagunson nga daog sa Cebu City Collegiate Invitational Basketball Tournament 2026 niadtong Biyernes sa gabii, Agosto 7, sa Cebu City Sports Institute Gym sa Barangay Sawang Calero.

Si Christopher Hubilla mipupo og 17 puntos, unom ka rebounds, duha ka assists, usa ka steal ug usa ka block samtang sila si Sean Salvador ug Jamhir Eligado nagkumboya'g 21 puntos sa dihang ang Heavy Bombers miangkon sa solong liderato uban ang 2-0 rekord.

Human sa sikit nga kumbati sa nag-unang duha ka kuwarter, ang Heavy Bombers nagmangtas sa second half. Gisirad-an nila ang ikatulong kuwarter bitbit ang 60-47 nga bentaha, nga ila pang gipaburot ngadto sa 25 puntos, 74-49, sa hilimatyong segundos sa duwa.

Si Lanze Graham Sabroso maoy bugtong double-digit scorer bitbit ang 13 puntos alang sa Red Warriors, nga nakatilaw sa ikaduha nilang sagunson nga pildi.On the other hand, the reigning Cebu Schools

Sa laing bahin, ang Cebu Schools Athletic Foundation, Inc. (CESAFI) four-peat champions University of the Visayas (UV) Green Lancers naka-eskapo sa Benedicto College Cheetahs uban ang 79-77 nga kadaogan.

Ang Lancers nakabentaha og 17 puntos, 49-32, sa halftime apan ang Cheetahs milusad og nagkayong resbak aron pagpuwersa og 77-77 nga panagtabla.

Dinhi na si Ivan Clark Alsola misul-ot sa kapa sa usa ka bayani ug dayon mipasud sa krusyal niyang jumper sa pinal nga 50 segundos nga nakasalbar sa Green Lancers.

Si AJ Sacayan maoy nangu sa Lancers uban ang 16 puntos, lima ka rebounds ug usa ka assist samtang sila si Raul Gentallan ug Paul John Bautista mitali og 14 ug 10 puntos.

Si Den Ric Orgong mipabuto og 26 puntos nga iyang gisukipan og  duha ka rebounds, tulo ka steals ug duha ka blocks apan wala mosaler ang impresibo niyang salida kay ang Cheetahs naparot sa ikaduhang sunod-sunod nga higayon.