UC Webmasters mibihag sa UE Red Warriors

CEBU, Philippines — Sila si Ricofer Sordilla ug Maverick Eligoyo nagkumbinar og 64 puntos aron ibandera ang University of the Cebu (UC) Webmasters ngadto sa 89-85 nga pagpakugang sa University of the East (UE) Red Warriors sa Cebu City Collegiate Invitational Basketball Tournament 2026 niadtong Huybes, Agosto 6, sa Cebu City Sports Institute sa Barangay Sawang Calero.

Si Sordilla mipaulbo og 35 puntos uban ang upat ka rebounds, unom ka assists, ug usa ka steal samtang si Eligoyo miharos og 29 puntos, unom ka rebounds, usa ka assist, usa ka steal, ug duha ka blocks aon ituboy ang Webmasters ngadto sa impresibong sinugdanan ning unom ka adlaw nga torneyo nga nagtanyag og P130,000 sa kampiyon.

Ang Webmasters ni coach Kernn Sesante nabiyaan og 13 puntos, 14-27, human sa unang kuwarter aron milusad og eksplosibong opensiba sa second half aron bughaon ang bisitang UAAP team.

Alkansi gihapon 41-50 sa halftime, ang Webmasters mitagak og 27 puntos sa ikatulong kuwarter samtang gilimitahan ang Red Warriors ngadto lamang sa 13 puntos aron ilogon ang labaw,  68-63, padung sa katapusang 10 minutos. Ang Webmasters miinat sa ilang bentaha ngadto sa siyete puntos, 70-63, ug dayon nakalahutay ngadto sa kulbahinam nga kadaogan.

Ang Webmasters naglaraw sa ikaduha nilang sunod-sunod nga daog sa dihang ilang sangkaon ang Jose Rizal University (JRU) Heavy Bombers sa alas-4 sa hapon karong adlawa (Sabado, Agosto 8). Ang Heavy Bombers misikad sa ilang kampanya uban ang  78-65 nga paglampaso sa Benedicto College (BC) Cheetahs.

Ang Sugbuanong guard nga si Lawrence Mangubat ang bida sa JRU bitbit ang 19 puntos, tulo ka rebounds, usa ka assist ug usa ka steal.

  Si Christopher Hubilla midugang og 16 puntos, upat ka rebounds, tulo ka assists ug usa ka steal samtang si Allan Laurenaria miamot og 12 puntos, lima ka rebounds ug usa ka block alang sa dominante kaayong Heavy Bombers, nga usa usa ka higayon miabante og 20 points, 52-32, sa sayong bahin sa ikatulong kuwarter.