Lola nabulasot sa septi tank

CEBU, Philippines — Patay nang nakit-an sulod sa usa ka septic tank sa usa ka subdivision sa Barangay Tungkil, Minglanilla ang usa ka 77-anyos nga babaye nga pipila ka adlaw ng gipangita sa iyang pamilya human kini mawala sa ilang balay.

Ang biktima giila nga si Glenda Petallana Angel, 77, residente sa Barangay Tungkil, Minglanilla. Base sa imbestigasyon sa Minglanilla Municipal Police Station, usa ka residente sa subdivision ang nakadiskubre sa lawas sa biktima human niya nabantayan niyang nahugno ang kongkretong tabon sa septic tank.  Sa dihang iyang gisusi ang sulod niini, nakita niya ang lawas sa babaye nga naglutaw sa tubig sa ilawom maong gipahibalo dayun ni sa mga silingan ug sa kapolisan nga miresponde sa maong lugar.

Matud ni Police Lieutenant Colonel Maria Theresa Macatangay, hepe sa Minglanilla Municipal Police Station, giila dayon sa mga anak sa iyang lawas.

Nasayran sa kapolisan nga adunay Alzheimer’s disease ang tiguwang ug nawala kini sa ilang balay mga alas 3 sa kaadlawon niadtong Lunes, Agosto 3. Kataposan siyang nakit-an galakaw sa Barangay Tungkil mga alas 4 sa kaadlawon.

Ilaha dayun ning gi-report sa kapolisan ug gi-post sa pamilya ang iyang litrato ug impormasyon sa social media ug pagpahibalo sa mga estasyon sa radyo sa Cebu aron mapadali ang pagpangita kaniya. Matud pa sa kapolisan, sa silong kini natulog atong Domingo sa gabii ug ang iyang apo nga nagbantay kaniya didto natulog sa taas apan pagmata sa pamilya pagkabuntag, wala na nila makita. Dugang pa sa kapolisan, adunay mga residente sa subdivision nga nagsige og uwang ug paghot ang mga iro duol sa septic tank sayo sa buntag niadtong Lunes.  Pero wala sila magdahum nga naa diay nahulog didto nga tawo. Sa inisyal nga imbestigasyon walay nakitang timailhan nga adunay foul play sa kamatayon niini ug gituohan nga aksidente kining nahulog sa septic tank.

Giproseso sa Scene of the Crime Operatives (SOCO) ang lawas sa biktima ug gihulat pa ang resulta sa autopsy aron matino ang tinuod nga hinungdan sa iyang kamatayon. IBM BANAT NEWS