Eala gilihian og daog sa Canadian Open

CEBU, Philippines — Ang garbo sa Pilipinas nga si Alex Eala miabli sa iyang kampanya alang sa laing korona uban ang impresibong 6-1, 4-6, 6-2 nga kadaogan batok sa Amerikanang si Alycia Parks aron pagmartsa ngadto sa Round of 32 sa WTA 1000 National Bank Open kagahapong adlawa didto sa Sobeys Stadium sa Toronto, Canada.

Lab-as pang misakmit sa makasaysayanon niyang WTA title sa Mubadala DC Open sa miaging semana, si world No.20 Eala mipakita dayon og timalihan sa seryoso niyang tinguha nga moalsa og laing tropeyo human niya ipatikangkang si Parks.

Tam-is nga panimalos ang nakab-ot ni Eala, nga gipildi ni Parks 0-6, 6-3, 6-2 sa miagi nilang sangka sa Australian Open 2026 niadtong Enero.

Si Eala, nga nakadawat og first-round bye isip 25th seed sa torneyo nga nailhan sab nga Canadian Open,

impresibong midaog sa unang set, 6-2, apan si Parks miresbak, 6-4, aron pagpuwersa og deciding set.

Sa tinagakay nga duwa, si Eala nagmangtas human sa 2-2 nga panagtabla diin siya mikadlit og upat ka sagunson nga puntos aron tagakon sa hingpit si Parks.

Ang 21-anyos nga si Eala makigharong sunod batok sa kababayan ni Parks nga si Caty McNally, nga miabante human gipalagpot si Wimbledon champion Linda Noskova 7-6 (7-5), 6-1.