Mix Hoopers nagmangtas dayon

CEBU, Philippines — Ang Mix Hoopers maoy nangu sa mga mananaog pagsikad sa D'Generals Basketball Club Season 4:Camaraderie Cup didto sa Aulga City Sports sa Barangay Lawaan II, dakbayan sa Talisay.

Si Ruben Laraga mitali og 12 puntos, upat ka rebounds ug lima ka assists aron ibandera ang Mix Hoopers ngadto sa 72-49 nga paglampaso sa Rise Up.

Ang Jackermz Best Player of the Game nga si Laraga gisuportaan ni Junrey Nebres uban ang otso puntos, 10 ka rebounds, ug tulo ka assists.

Sa laing bahin, si Michael Nicole Tabas milansang og 19 puntos uban ang lima ka rebounds ug tulo ka assists samtang si Andrei Reyes midugang og 16 puntos, unom ka rebounds, ug upat ka assists sa dihang gitumba sa Gunners ang Still&Motion, 81-70.

Sa ubang mga resulta,  ang Lightsout mipayaka sa Iron Bull, 84-73, samtang ang Go Hard mibuntog sa Blitz, 76-73.

Si Gene Bayonita ang bida sa Lightsout uban ang 20 puntos, lima ka rebounds, ug upat ka assists aron mamahimong Shoe-Ice Best Player of the Game. Mihimo sab og kasikas si Hurvy Pegarido uban ang 15 puntos, upat ka rebounds, ug lima ka assists.

Si Feljun Cebes ang miagak sa Go Hard uban ang 17 puntos, lima ka rebounds, ug upat ka assists inabagan ni John Mark Cañeda nga mitimbre og 11 puntos, tulo ka rebounds, ug unom ka assists.