Vaccination drive himoon sa DOH karong Agosto 10-28

CEBU, Philippines — Gipahibalo sa Department of Health-Central Visayas (DOH-7) ang Supplemental Immunization Activity (SIA) batok sa measles ug rubella sugod Agosto 10 hangtod 28, samtang giawhag ang mga ginikanan nga pabakunahan ang ilang mga anak nga nag-edad og unom ka bulan hangtod 59 ka bulan.

Miingon si Dr. Faith Curaraton, regional National Immunization Program coordinator sa DOH-7, nga target sa kampanya ang 95 porsiyentong vaccination coverage aron mapugngan ang posibleng outbreak sa duha ka sakit nga dali kaayong motakod apan mapugngan pinaagi sa bakuna.

Ang regional launching himuon sa Agosto 10 sa Cebu Provincial Capitol Social Hall, samtang ipatuman usab ang vaccination sa tanang LGU sa Cebu, Bohol, Negros Oriental ug Siquijor, lakip ang mga dakbayan sa Cebu, Lapu-Lapu ug Mandaue.

Dugang ni Curaraton, ang mga batang mabakunahan makadawat usab og Vitamin A supplementation aron mapalig-on ang ilang resistensya.

Gipasabot niya nga ang measles mahimong mosangpot sa pneumonia, encephalitis o brain inflammation, malnutrition ug bisan kamatayon, ilabina sa mga bata, samtang ang rubella mahimong delikado usab ilabina sa mga mabdos.

Giila usab sa DOH-7 nga usa sa dagkong hagit ang vaccine hesitancy tungod sa misinformation, apan gipasalig nga luwas ug epektibo ang mga bakunang gamiton ug adunay igo nga suplay alang sa kampanya.

Giawhag ang mga ginikanan nga moduol sa ilang Rural Health Unit, City Health Office o barangay health center alang sa hustong impormasyon ug pahimuslan ang libreng bakuna. (BANAT NEWS)