Gidaghanon sa turista nga nibisita sa Probinsiya sa Sugbo nikunhod

CEBU, Philippines — Bisan og nikunhod og kapin sa 100,000 ang gidaghanon sa mga turistang nibisita sa Probinsiya sa Sugbo sa unang unom ka bulan sa 2026 itandi sa samang panahon niadtong 2025, nagpabiling positibo ang Cebu Provincial Tourism Office (CPTO) nga makabawi pa ang sektor sa turismo sa dili pa matapos ang tuig.

Base sa tourism monitoring report hangtud sa Hulyo 28, 2026 nakatala ang lalawigan og 836,595 ka tourist arrivals gikan Enero hangtud sa Hunyo 2026 diin nikunhod kini og 10.71 porsyento itandi sa 936,939 ka bisita sa samang panahon sa niaging tuig.

Matud sa CPTO nga ang labing dakong hinungdan sa pagkunhod mao ang ubos nga domestic tourist arrivals.

 Apan nakita usab sa ilang datos nga hinay-hinay na’ng niuswag ang ihap sa mga langyaw’ng turista nga nisuroy sa lalawigan.

Si Provincial Tourism Officer Rowena Montecillo nagkanayon nga dili pa sila mabalaka sa maong sitwasyon tungod kay kasagarang mosaka ang domestic tourism panahon sa peak season ug dili pa usab kompleto ang mga report nga ilang nadawat gikan sa ubang lungsod.

Sa breakdown sa datos, nikabat sa 653,016 ang domestic tourist arrivals diin nikunhod kini og 12.29 porsyento gikan sa 744,523 sa unang semestre sa 2025.

Samtang ang foreign arrivals nikabat sa 183,533 nikunhod kini og 4.61 porsyento gikan sa 192,397 sa niaging tuig apan mas maayo kini kompara sa niaging report diin mas dako pa ang pagkunhod.

Nisaka usab ang gidaghanon sa Overseas Filipino Worker (OFW) visitors ngadto sa 46 kompara sa 19 sa samang panahon niadtong 2025.

Nagpabilin ang South Korea nga nag-unang foreign source market sa Sugbo nga adunay 45,083 ka bisita, gisundan sa Japan, Estados Unidos, China ug Taiwan.

Positibo usab ang pagsaka sa ubang merkado sama sa Germany, Australia, France, Canada, United Kingdom, Russia, Italy, Malaysia, Spain, India, Netherlands, Switzerland ug Singapore.

Usa sa labing dakong pagsaka sa foreign market ang China nga adunay 156.62 porsyentong pagtubo samtang nisaka usab ang ihap sa mga bisita gikan sa United Kingdom, Canada ug uba’ng nasud sa Europe.

Si Montecillo nagkanayon nga base sa ilang pakigpulong sa tourism stakeholders nagkadako ang interest sa mga turista sa mga lungsod sa lalawigan diin ilang masinati ang mga baybayon, lokal nga pagkaon, kultura, pista ug nagkadaiyang mga kalihokan.

Sa datos sa CPTO, ang Cordova maoy adunay pinakadaghang natala nga tourist arrivals nga 114,868, gisundan sa Oslob, Moalboal, Bantayan ug Daanbantayan.

Samtang adunay pipila ka lungsod nga wala pa makahatag sa ilang tourism reports hinungdan nga niawhag ang CPTO sa mga lokal nga kagamhanan nga mahuman ang ilang submissions aron mahimong mas kompleto ang tourism data sa unang tunga sa tuig. BDB BANAT NEWS