Dwight tagilid sa Asian Games

MANILA, Philippines — Tagilid si Filipino-American Dwight Ramos na makapaglaro sa Gilas Pilipinas na aarangkada sa 2026 Asian Games sa Nagoya, Japan sa Setyembre.

Sinabi ni Ramos sa isang ulat na posibleng hindi ito makalaro para sa Gilas na dedepensahan ang korona sa Asian Games.

Ayon sa Gilas standout, schedule ang pangunahing dahilan lalo pa’t magkakasabay ang Asian Games at ang Japan B.League.

Nakatakdang magsi­mula ang Japan B.League sa huling bahagi ng Set­yembre kaya’t tatama ito sa schedule ng Asian Games.

Babalik si Ramos sa Levanga Hokkaido matapos pumirma ng bagong kontrata.

Bahagi pa naman si Ramos ng Gilas Pilipinas pool na isinumite ng Philippine Olympic Committee (POC) sa Asian Games organizing committee.

Maliban kay Ramos, mag­lalaro rin sa Japan B.League sina Quentin Mil­lora-Brown (Nagoya Dia­mond Dolphins) at Michael Phillips (Kyoto Hannaryz).

Walang basbas ng FIBA ang Asian Games kaya’t hindi ito kasama sa kalendaryo ng FIBA tournaments.

Karaniwan nang nagkakaroon ng break ang mga professional leagues sa tuwing may FIBA-sanctioned events para bigyan ng pagkakataon ang mga miyembro ng national team para maglaro sa kani-kanyang bansa.

Maglalaro rin sa Japan B.League sina Ray Parks (Ibaraki Robots), Kiefer Ravena (Ryukyu Golden Kings), Thirdy Ravena (Toyama Grouses), Jamie Malonzo (Earthfriends Tok­yo) at Matthew Wright (Saitama Broncos).

Subalit hindi pa malinaw kung kasama sila sa Gilas pool sa Asian Games.

Inaasahang ilalabas ng Samahang Basketbol ng Pilipinas ang opisyal na lineup nito ilang araw bago magsimula ang Asian Games.

Nangunguna sa listahan si naturalized player Justin Brownlee

Nakatakdang ipagtanggol ng Gilas ang korona nito sa Asian Games na nakuha nito matapos patumbahin ang Jordan sa finals, 70-60, noong 2023 Hangzhou Games.