3 patay kay ‘Kiyapo’, habagat

MANILA, Philippines — Tatlo katao ang iniulat na nasawi habang isa pa ang nawawala dulot ng pinagsamang epekto ng bagyong Kiyapo at southwest monsoon o habagat.

Sa ipinalabas na situational report ng National Disaster Risk Reduction Management Council (NDRRMC) kahapon, ang mga nasawi ay mula sa Davao Region at SOCCSKSARGEN na dumanas ng mga pagbaha sanhi ng malalakas na pag-ulan.

Ayon kay Diego Agustin Mariano,  Deputy Spokesperson ng Office of Civil Defense (OCD) sa ilalim ng NDRRMC, dalawa sa mga nasawi ay mula sa SOCCSKSARGEN at isa naman sa Davao Region. Isa pang residente sa Sarangani ang patuloy na pinaghahanap.

Umabot naman sa 59,987 pamilya o 285,172 indibidwal mula sa 258 barangay sa pitong rehiyon ang nakaranas ng pinsala.