LTO 7: Way plaka dili diretsong i-impound
CEBU, Philippines — Gipasabot sa Land Transportation Office sa Central Visayas (LTO-7) nga ang mga sakyanan nga wala pay pisikal nga plaka dili awtomatikong isyuhan og tiket o i-impound tungod kay daghan pa ang wala nahimoan og plaka tungod sa backlog sa produksiyon niini ug mga kalangan sa pagproseso sa mga awtorisadong dealers.
Matud ni LTO-7 Regional Director Atty. Wendel Dingalasan kinahanglan lang nga balido ilang rehistro ug walay mga violations.
Giawhag sab niya ang mga tag-iya og sakyanan nga kuhaon dayon ang ilang mga plaka kun naabot na sa ilang opisina ilabi na karon nga gipangusgan ang kampanya sa pagapud-apod sa mga plaka sa tibuok rehiyon.
Aron masulbad ang nahibiling backlog, gipatuman sa LTO-7 ang nagkadaiyang mga programa sama sa Plate Distribution Drives, Plate Tracker system, Friendly Flag Down operations ug uban pang mga kalihokan sa serbisyo publiko aron matabangan ang mga motorista sa pag-verify, pagpangita ug pagkuha sa ilang dugay nang gipaabot nga mga plaka.
Giawhag usab ni Dingalasan ang mga motorista nga makigkoordinar sa labing duol nga opisina sa LTO ug magdala sa ilang balidong mga dokumento sa rehistro aron mapadali ang pagpagawas sa ilang mga plaka ug masiguro ang pagsunod sa mga balaod.
Una nang gipahibalo ni Dinglasan nga nakapagawas na ang ahensya og mga 50,000 ka plaka sa mga motorsiklo ug uban pang sakyanan sulod sa iyang unang tulo ka bulan isip regional director.
Bisan pa sa maong kalampusan, gibutyag ni Dingalasan nga adunay gihapoy gibanabanang 200,000 hangtod 250,000 ka mga plaka nga wala pa makuha sa mga tag-iya.
“Kami na ang lumalapit sa kanila kasi ang iba tinatamad nang pumunta sa opisina ng LTO. Pero kung tutulungan nila kami at sila mismo ang pupunta sa LTO, mas mapapabilis ang pag-resolve ng backlog,” matud pa niya. (BANAT NEWS)
- Latest
