PUJ nibangga sa poste sa traffic light, duha naangol
CEBU, Philippines — Duha ka tawo ang naangol human mibangga ang ilang gisakyang public utility jeepney (PUJ) sa poste sa traffic light sa Cebu South Coastal Road (CSCR) duol sa Barangay San Isidro, Dakbayan sa Talisay alas-3 sa kadlawon niadtong Miyerkules, Hulyo 22.
Ang mga naangol mao ang drayber nga si Jasper Caingles, 45 anyos ug ang konduktor nga si Jovhille Largo, 28 anyos.
Natanggong kadiyot si Caingles sulod sa jeep human sa pagbangga ug nakaangkon og mga samad, samtang gagmayng samad ang naangkon ni Largo.
Matud ni Caingles, pauli na sila sa ilang garahe sa Barangay Poblacion human nipakanaug og pasahero sa Tabunok sa dihang nahitabo ang insidente.
Pag-abot sa interseksyon paingon sa Barangay Dumlog, giingong kalit nga miliko sa tuo ang usa ka dump truck bisan og naka-stop signal ang iyang linya.
Tungod niini, milikay siya aron malikayan ang bangga, apan nawad-an og kontrol ang jeep ug mibangga sa poste sa traffic light.
Matud pa sa drayber, mas gipili niyang molikay kay basin mas grabe pa ang mahimong resulta kon direkta silang magbangga sa dump truck.
Gitan-aw usab ang CCTV footage isip kabahin sa imbestigasyon aron matino ang tibuok nga panghitabo. — (BANAT NEWS)
- Latest
