CCDRRMO nangandam nonot sa mga pag-uwan

CEBU, Philippines — Gipahimangnuan sa Cebu City Disaster Risk Reduction and Management Office (CCDRRMO) ang publiko nga mahimong alerto nonot sa dili maayong kahimtang sa panahon.

Suma pa ni Konsehal Dave Tumulak kinsa tsirman sa CCDRRMC nga naka-alerto na ang disaster teams sa tanang barangay sukad pa niadtong Domingo, Hulyo 19.

Lakip sa gipasidan-an ang mga residente nga magmatngon sa pagtabok sa mga sapa ug magbantay sa posibleng pagdahili sa yuta ug kanunay nga magsubay sa opisyal nga weather advisories.

Magpadayon ang madag-umon nga kalangitan nga dunay pag-uwan ug dugdog karong adlawa dinhi sa Dakbayan sa Sugbo tungod sa Habagat o Southwest Monsoon.

Sa pinakabag-ong localized weather forecast sa Philippine Atmospheric, Geophysical and Astronomical Services Administration (PAGASA), adunay 90 porsiyentong posibilidad sa uwan ug gilauman ang katag nga pag-uwan ug pagdugdog sa buntag nga mahimong kusog nga pag-uwan sa hapon. Magpabilin usab ang pag-uwan-uwan hangtod sa gabii.

Gibanabana nga ang temperatura mokabat sa 25°C hangtod 31°C.

Ang hangin mopadayon gikan sa habagatan-kasadpan sa gikusgon nga 10 hangtod 15 kilometro matag oras.

Gipasidan-an ang publiko sa posibleng pagbaha ug pagdahili sa yuta ilabina sa mga lugar nga dali maapektuhan sa kusog ug padayon nga pag-uwan.

Suma pa sa PAGASA, ang Habagat maoy nagdala og pag-uwan sa Central Visayas, samtang aduna’y low pressure area sa sidlakan sa Philippine Area of Responsibility nga nagpalig-on sa epekto sa Habagat. — (BANAT NEWS)