Nanuslak og mata, nadakpan

CEBU, Philippines — Nadakpan sa kapolisan  atol sa hot pursuit operation ang usa ka 45-anyos nga e-bike driver nga gipasanginlang niduslak og screwdriver sa mata sa usa ka 48-anyos nga lalaki atol sa ilang panaglalis sa Barangay Inayawan, Cebu City.

Ang suspek gidakop alas 5:20 sa hapon sa Domingo, Hulyo 19, ubos sa citizen’s arrest sa F. Jaca Street, Whiteroad, Barangay Inayawan, wala pay 24 oras sukad nahitabo ang insidente alas 6:50 sa gabii sa Sabado, Hulyo 18.

Matud sa Inayawan Police Station, mikuyog ang biktima sa mga operatiba atol sa operasyon ug positibo niyang giila ang suspetsado nga maoy nituslok sa iyang mata.

Matud ni Police Master Sergeant Alfredo Macabudbud sa Inayawan Police Station, nagsugod ang panaglalis tungod sa alegasyon nga namaligya og shabu ang suspetsado.

Dugang sa opisyal, ang biktima nagpahulay samtang nagtrabaho isip caretaker sa usa ka fishpond sa dihang giduol siya sa suspetsado ug gidudahan sa suspek nga maoy naghimo-himo og estorya batok sa iyaha hinungdan sa mainiton nilang panaglalis.

Giingon ni Macabudbud nga daan nang nagdala og screwdriver ang suspetsado sa dihang iyang giatubang ang biktima ug mao ni iyang gigamit pagtuslok sa wala nga mata sa biktima.

Gihimakak sa suspetsado nga nalambigit siya sa illegal nga drugas ug matud pa bunga lang sa iyang kasuko nganong iyang giduslak ang mata sa biktima.

Matud pa ni Macabudbud, nakaiskedyul nga operahan ang biktima tungod sa samad sa iyang mata samtang giandam na ang kasong ipasaka batok sa suspek. IBM BANAT NEWS