Mayor Gungun ni-counterflow nabangga

CEBU, Philippines — Gisuspenso sa Land Transportation Office (LTO)-7 og 90 ka adlaw nga preventive suspension ang driver’s license ni Dumanjug Mayor Efren “Gungun” Gica ug giisyuhan siya og show cause order human sa usa ka aksidente sa dalan sa Minglanilla, Cebu nga nag viral sa social media.

Nahitabo ang aksidente niadtong Hulyo 19, 2026, sa northbound lane sa national highway sa Barangay Pakigne, Minglanilla, diin nalambigit ang usa ka Toyota Hi-Ace van ug usa ka motorsiklo.

Base sa inisyal nga administratibong ebalwasyon sa LTO-7, posible nga nakalapas si Gica sa Land Transportation and Traffic Code, lakip ang reckless driving, pagpadagan og sakyanan nga walay gipakita nga husto nga plaka, ug dili angayan mo-operate og motor vehicle, uban sa uban pang posibleng administratibong kalapasan.

Gimandoan sa LTO si Gica nga personal nga motunga sa Operations Division sa LTO-7 sulod sa lima ka adlaw gikan sa iyang pagdawat sa mando ug mosumite og verified o sinumpaang sinulat nga tubag uban sa mga ebidensya nga mosuporta sa iyang depensa.

Samtang nagpadayon ang administratibong imbestigasyon, gibutang sa LTO ang driver’s license ni Gica ubos sa 90 ka adlaw nga preventive suspension nga epektibo dayon sa pagdawat niya sa show cause order ug gimandoan usab siya nga itugyan ang orihinal niyang driver’s license.

Si LTO-7 Regional Director Atty. Wendel C. Dinglasan miingon nga ang pag-isyu sa show cause order kabahin sa due process ug dili pa kini nagpasabot nga adunay administratibong liability ang mayor. “The Land Transportation Office remains committed to enforcing the law fairly, impartially, and without exception. Regardless of one’s position or status, every motorist is equally accountable under the law, while every respondent is afforded full due process before any final administrative action is taken,” matud ni Dinglasan.

Nagpagawas sabsi Gica og pamahayag ug pagpangayo og pasaylo pinaagi sa iyang Facebook page ug giangkon nga ang iyang sayop ug iyang giako ang responsibilidad.

 “I was involved in a road incident caused entirely by my own mistake. I make no excuses. I was wrong, and I take full accountability for what happened,” matud ni Gica.

Nangayo usab siya og pasaylo sa tag-iya ug drayber sa van nga nalambigit sa aksidente ug miingon nga iyang bayran ang tibuok gasto sa pagpaayo sa sakyanan ug ang makatarunganong kapildihan samtang dili pa kini magamit.

 “I am committed to shouldering all damages and making full restitution without delay,” matud niya. Nagpasalamat usab si Gica nga walay naangol sa maong insidente.

“Vehicles and property can be repaired or replaced, but human life and safety will always be of far greater importance,” dugang pa niya.

Nangayo usab og pasaylo ang mayor sa iyang kaubang mga miyembro sa HPG Tigers ug miingon nga iyaha katong sayup ug dili angay isipon nga repleksyon sa mga prinsipyo sa organisasyon. IBM BANAT NEWS