Pagkaon para sa Walang Gutom Program makuha na

CEBU, Philippines — Kapin sa 25,000 ka benepisyaryo sa Walang Gutom Program sa Department of Social Welfare and Development (DSWD) sa Central Visayas ang maka redeem sa ilang binulan nga food packages sugod Hulyo 20 hangtod Agosto 10, 2026 pinaagi sa mga DSWD-accredited retailers sa rehiyon. Sumala sa DSWD Field Office 7, mokabat sa 25,525 ka benepisyaryo ang makakuha sa ilang food credits, diin 21,214 gikan sa Cebu ug 4,311 gikan sa Bohol.

Ang mga kwalipikadong benepisyaryo nga cardholders sa Rural Bank of Guinubatan, Inc. (RBGI) ug Universal Storefront Services Corporation (USSC) kinahanglang mopakita sa ilang electronic benefit transfer (EBT) card ug balidong ID aron makuha ang nutrient-rich food packages. Gipatin-aw sa DSWD nga ang redemption karon alang lamang sa mga benepisyaryo ubos sa Listahanan 3 o National Household Targeting System for Poverty Reduction (NHTS-PR), samtang nagpabiling suspendido ang redemption sa mga kabalayan nga giila pinaagi sa Community-Based Monitoring System (CBMS).

Giawhag ang mga benepisyaryo nga mokonsulta sa ilang Community Engagement Coordinators (CECs), DSWD field personnel, barangay officials, o lokal nga panggamhanan aron masayran ang iskedyul ug lugar sa redemption.  Kon dili sila personal nga makaredeem, mahimo silang magtugot og laing miyembro sa panimalay nga dili menor de edad pinaagi sa authorization letter ug gikinahanglang mga ID. Ang Walang Gutom Program gipatuman sa 89 ka local government units sa Central Visayas, lakip ang 53 ka LGUs sa Cebu ug 36 ka LGUs sa Bohol.  MEL BANAT NEWS